នេះជារឿងមួយត្រូវបានកាសែតចិនចុះផ្សាយ ។ ខ្លឹមសារនៃរឿងនេះគឺ ៖
នាថ្ងៃមួយនៅខែសីហា ឆ្នាំ ១៩៩៦ លោកវ៉ាង កំពុងដកស្មៅនៅសួនច្បារក្បែរផ្ទះ ក៏ឃើញពស់មួយក្បាលដេកសម្ងំស្ងៀមលើផ្ទាំងថ្ម ។ កន្ទុយរបស់វាមានស្នាមរបួសមួយកំពុងចេញឈាម ។ លោកបានហុចដៃទៅកាន់សត្វនោះ ពុំឃើញវាមានសញ្ញាចង់ប្រតិកម្មត ហាក់ដូចជាវាដឹងថាគាត់មានបំណងល្អ ។ មួយសន្ទុះក្រោយមកគាត់សម្រេចចិត្តយកវាមកផ្ទះ រួចថែទាំមុខរបួសរហូតដល់ជា ។
ពេលនោះពស់នេះមានទម្ងន់មិនដល់ ៤ក្រាមផង ហើយដំបូងលោកវ៉ាង គិតថារក្សាទុកវាមួយរយៈដើម្បីចិញ្ចឹមលេង ស្មានពុំដល់ថា វាបានផ្សារភ្ជាប់ជាមួយក្រុមគ្រួសារលោករហូតទល់ពេលនេះ ។ ឥឡូវវាមានប្រវែងជិត ៤ម៉ែត្រ និងទម្ងន់ជិត ៥០គីឡូក្រាម ។
តាំងពីចិញ្ចឹមវារហូតទល់ពេលលោករៀបការប្រពន្ធ និងមានកូនថ្លាន់មួយក្បាលនេះបានក្លាយជាសមាជិកគ្រួសារមួយមិនអាចខ្វះបានក្នុងគ្រួសារត្រកូលវ៉ាង ។ ពស់មួយក្បាលនេះ វាមានចំណូលចិត្តដូចមនុស្សគឺដេកលើខ្នើយ ហើយដណ្តប់ភួយ ។
វាបានក្លាយជាសមាជិកមួយមិនអាចខ្វះបានរបស់គ្រួសារត្រកូលវ៉ាង ។
លោកវ៉ាងឲ្យដឹងថា វាហាក់ដូចជាចេះស្តាប់ភាសារបស់អមនុស្សអីចឹង ។ ម្តងនោះលោកបានសាកល្បងនិយាយលេងជាមួយវាថា ៖ ថ្លាន់អើយ ឥឡូវអញមិនចង់ចិញ្ចឹមឯងទៀតទេ ឯងចេញទៅក្រៅរកអ្វីស៊ីខ្លួនឯងចុះ ។ លោកវ៉ាង ពិតជាស្មានមិនដល់ថា ក្រោយពេលនិយាយបែបនេះ ម្តងជាពីរដង ថ្លាន់នេះបានចាកចេញពីផ្ទះមែន ហើយទៅបាត់រហូតដល់ជាងមួយខែឯណោះ។
ស្រាប់តែ ៤៨ថ្ងៃ ក្រោយមកវាលូនត្រឡប់មកវិញ ហើយឡើងលើគ្រែដេករបស់លោកដូចសព្វមួយដងដោយនាំមកតាមនូវធូលីដីប្រឡាក់អស់ភួយខ្នើយ ។
ក្រោយមកលោកបានរៀបការ ហើយមានកូន ។ ថ្លាន់មួយក្បាលនេះបន្តនៅផ្ទះរបស់លោកដដែល ហើយពិតជាចម្លែកណាស់វាបង្ហាញភាពស្និទ្ធស្នាលនឹងធ្វើឲ្យភរិយាព្រមទាំងកូនលោកពុំមានអារម្មណ៍ខ្លាចវាបន្តិចសោះឡើយ ។
ក្នុងកិច្ចសម្ភាសន៍មួយ លោកបានចែករំលែកប្រាប់អ្នកកាសែតថា មិនទាន់បានគ្រប់មួយឆ្នាំផង កូនប្រុសលោកតែងអង្គុយលេងលើខ្នងពស់ថ្លាន់នេះ ហើយវាពិតជាចូលចិត្ត និងពុំដែលធ្វើឲ្យកូនលោករបួសសូម្បីបន្តិចណាសោះឡើយ ។ រៀងរាល់ពេលដែលប្តីប្រពន្ធលោកមានការចេញទៅក្រៅ ថ្លាន់នេះក្លាយជាមេដោះមើលថែកូនលោក ។ អ្នកជិតខាងដែលដឹងរឿងរ៉ាវចម្លែកនេះ បានហៅថ្លាន់នេះថា “ម៉ែដោះថ្លាន់” ។
មិនត្រឹមតែជាមេដោះដ៏ល្អឡើយ ថ្លាន់នេះនៅជាអង្គរក្ស ដ៏ខ្លាំងពូកែរបស់គ្រួសារត្រកូលវ៉ាង ។
មានយប់មួយនោះប្តីប្រពន្ធលោកកំពុងដេក ស្រាប់តែឮសម្រែកស្រែកខ្លាំងៗ ។ លោកក៏ស្ទុះចេញមកកាន់បន្ទប់ទទួលភ្ញៀវ ហើយពិតជាស្រឡាំងកាំង កំពុងរឹបជាប់បុរសចម្លែកមុខម្នាក់ ។ តាមពិតទៅនោះគឺជាចោរដែលឆ្មក់ចូលប៉ងលួចឥវ៉ាន់ក្នុងផ្ទះលោក ហើយត្រូវថ្លាន់នេះ “ក្របួចជាប់”។
ថ្វីបើជាសត្វថ្លាន់មួយដ៏ធំក្តី តែវាតែងធ្វើឲ្យអ្នកជិតខាងពេញចិត្ត ពិសេសមានម្តងនោះវាបានក្លាយជាវរៈជន ព្រោះបានជួយសង្គ្រោះជីវិតក្មេងក្នុងភូមិ ។
តំបន់ដែលត្រកូលវ៉ាងរស់នៅ គឺក្បែរទន្លេក្មេងៗចូលចិត្តហែលទឹកលេង ។ ស្រាប់តែម្តងនោះ ព្រោះតែទឹកទន្លេ ហូរខ្លាំងពេកបានគួចយកក្មេងម្នាក់ទៅ។ ចៃដន្យពេលនោះពស់ថ្លាន់កំពុងស្ថិតនៅលើច្រាំង វាហែលសំដៅទៅក្មេងនោះយ៉ាងលឿន វាយកកន្ទុយគួចជាប់ក្មេងនោះ រួចហែលមកច្រាំងវិញដោយសុវត្ថិភាព ។
តាំងពីពេលនោះមកពស់ថ្លាន់នេះ មិនត្រឹមជាសមាជិកត្រកូលវ៉ាងនោះទេ វាបានក្លាយទៅជាមិត្តភក្តិស្និទ្ធស្នាលរបស់ក្មេងៗក្នុងតំបន់នោះ ៕ ចន្ទ្រា
