ភ្នំពេញ៖ បេឡាជាតិរបបសន្តិសុខសង្គម (ប.ស.ស) នៃក្រសួងការងារ និងបណ្តុះបណ្តាលវិជ្ជាជីវៈ នឹងប្តឹង បុគ្គល លោក រ៉ុង ឈុន ប្រធានសហភាពសហជីពទៅតុលាការ តាមច្បាប់ជាធរមាន ដែលបានញុះញង់ថា ប.ស.ស គេចវេសមិនទទួលខុសត្រូវ ចំពោះកម្មករ និយោជិត ដែលជួបគ្រោះថ្នាក់ការងារតទៅទៀត។
លិខិតបដិសេធរបស់ ប.ស.ស នៅថ្ងៃទី១៩ ខែឧសភា ឆ្នាំ២០១៨ ដែលផ្ញើមកបុគ្គលរ៉ុង ឈុន ដែលបានសរសេរ ក្នុងលិខិតគ្មានលេខ ចុះថ្ងៃទី១៩ ខែឧសភា ឆ្នាំ២០១៨។ សេចក្តីបដិសេធ បានអះអាងយ៉ាងដូច្នេះថា អ្នកនាំពាក្យបេឡាជាតិរបបសន្តិសុខសង្គម សូមធ្វើការបដិសេធចំពោះលិខិតគ្មានលេខ ចុះថ្ងៃទី១៩ ខែឧសភា ឆ្នាំ២០១៨ របស់បុគ្គល រ៉ុង ឈុន ដែលមានខ្លឹមសារផ្ទុយទាំងស្រុងពីសេចក្តីជូនដំណឹងលេខ ៣០/១៨ ប.ស.ស ចុះថ្ងៃទី១៧ ខែឧសភា ឆ្នាំ២០១៨របស់ ប.ស.ស។
ប.ស.ស សូមរក្សាជំហរទទួលខុសត្រូវចំពោះកម្មករ និយោជិត និងចាត់វិធានការដល់បុគ្គលទាំងឡាយណា ដែលធ្វើឱ្យប៉ះពាល់សិទ្ធិ និងអត្ថប្រយោជន៍របស់កម្មករ និយោជិត។ ប.ស.ស នៅតែបន្តការធានារ៉ាប់រង និងទទួលខុសត្រូវចំពោះកម្មករ និយោជិត ដែលមានបញ្ហាសុខភាព សន្លប់ជាបុគ្គល (ម្នាក់ ឬពីរនាក់) និងសន្លប់ជាសមូហភាព (ច្រើននាក់) ទោះបញ្ហាសន្លប់នោះ ពាក់ព័ន្ធនឹងការងារ ឬមិនពាក់ព័ន្ធនឹងការងារក្តី ក៏បងប្អូនកម្មករ និយោជិត អាចទទួលសេវាព្យាបាល និងថែទាំងវេជ្ជសាស្ត្រ នៅគ្រប់មជ្ឈដ្ឋានសុខាភិបាលដែលបានចុះកិច្ចព្រមព្រៀងជាមួយប.ស.ស ដោយឥតបង់ថ្លៃ។ ប.ស.ស នឹងប្តឹងបុគ្គលនេះទៅតុលាការ តាមច្បាប់ជាធរមាន។
កាលពីថ្ងៃទី១៩ ខែឧសភា ឆ្នាំ២០១៨ លោក រ៉ុង ឈុន បានចេញសេចក្តីថ្លែងការណ៍មួយ ដោយសម្តែងការសោកស្តាយចំពោះសេចក្តីជូនដំណឹងរបស់ប.ស.ស កាលពីថ្ងៃទី១៧ ខែឧសភា ឆ្នាំ២០១៨ ពាក់ព័ន្ធនឹងការបញ្ជាក់លើករណីដួលសន្លប់របស់កម្មករ។ លោកចោទថា តាមរយៈសេចក្តីជូនដំណឹងនេះ ជាការគេចវេសមិនទទួលខុសត្រូវចំពោះកម្មករ និយោជិត ដែលមានបញ្ហានៅកន្លែងធ្វើការ ឬម៉ោងធ្វើការ និងផ្ទុយពីសម្តេចតេជោ ហ៊ុន សែន ដែលបាន និងកំពុងចុះជួបកម្មករ និយោជិត។
សេចក្តីថ្លែងការណ៍របស់លោក រ៉ុង ឈុន ធ្វើឡើងបន្ទាប់ពីលោក អ៊ុក សមវិទ្យា នាយក ប.ស.ស បានចេញសេចក្តីជូនដំណឹង កាលពីថ្ងៃទី១៧ ខែឧសភាថា ចាប់ពីថ្ងៃទី១ ខែមិថុនា ឆ្នាំ២០១៨ទៅ រាល់ស្ថានភាពរបស់កម្មករ និយោជិត ដែលមានអាការៈ ខ្សោយ វិលមុខ ទន់ដៃទន់ជើង ញ័រទ្រូង ពិបាកដកដង្ហើម និងថប់អារម្មណ៍ ដែលបណ្តាលមកពីខ្វះជាតិស្ករក្នុងឈាម ឬខ្វះសារធាតុអ៊ីយ៉ុងក្នុងឈាម ហើយសន្លប់ជាបុគ្គលក្នុងកន្លែងធ្វើការ ឬម៉ោងធ្វើការ គឺ ប.ស.ស ចាត់ទុកថា ជាបញ្ហាសុខភាពផ្ទាល់ខ្លូនរបស់បុគ្គល មិនមែនបណ្តាលមកពីការងារ ឬបរិយាកាសកន្លែងធ្វើការ ដូចការយល់ឃើញទូទៅរបស់និយោជក ឬកម្មករ និយោជិតនោះទេ។ ដូច្នេះកម្មករ និយោជិតទាំងអស់ ត្រូវទទួលការព្យាបាល និងថែទាំវេជ្ជសាស្ត្រក្រោមរបបសន្តិសុខសង្គមផ្នែកថែទាំសុខភាពវិញ៕ ដោយ៖បញ្ញាស័ក្តិ
