ភ្នំពេញ ៖ ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ឆ្នាំ២០១៧ រយះពេល៣ថ្ងៃពីថ្ងៃទី២ដល់ទី៤វិច្ឆិកាបានប្រព្រឹត្តិទៅ និងបញ្ចប់ទៅក្រោមបរិយាកាសសប្បាយរីករាយ និងប្រកបដោយសុខដុមរមនាក្រៃលែង។ រយៈពេល៣ថ្ងៃនេះគ្មានអ្វីកើតឡើងបង្កភាពភ័យខ្លាចនោះទេគឺប្រកបដោយសុវត្ថិភាព។ រយៈពេល៣ថ្ងៃនេះ ប្រជាពលរដ្ឋរាប់សែននាក់ បានចូលរួមទស្សនា និងអបអរសាទរព្រះរាជពិធីបុណ្យយ៉ាងឱឡារិក ក្រោមការយកចិត្តទុកដាក់ និងបង្កភាពសប្បាយរីករាយ ភាពកក់ក្តៅ និងសុខសុវត្ថិភាព ពីសំណាក់រាជរដ្ឋាភិបាល ក៏ដូចជាអាជ្ញាធរដែនដីគ្រប់លំដាប់ថ្នាក់ក្នុងរដ្ឋបាលរាជធានីភ្នំពេញ។ មន្ត្រីរដ្ឋបាលរាជធានីពិតជាមានមោទនភាព និងសូមកោតសរសើរដោយស្មោះចំពោះទឹកចិត្តរបស់កងកម្លាំងគ្រប់ប្រភេទ ដែលបានប្រឹងប្រែងការពារសុវត្ថិភាពជូនបងប្អូនប្រជាពលរដ្ឋយើងមកចូលរួមបុណ្យអុំទូកបានយ៉ាងល្អប្រសើរ។
បើតាមការលោកឧត្តមសេនីយ៍ឯក ឆាយ គឹមខឿន ប្រធានលេខាធិការដ្ឋាន នៃគណៈកម្មាធិការជាតិរៀបចំបុណ្យជាតិអន្តរជាតិ បានបញ្ជាក់ក្នុងរបាយការណ៍ប្រចាំថ្ងៃទី៤ ខែវិច្ឆិកា ឆ្នាំ២០១៧ បានឲ្យដឹងថា នៅថ្ងៃទី៣ និងជាថ្ងៃចុងក្រោយ នៃព្រះរាជពិធីបុណ្យអុំទូក អកអំបុក បណ្តែតប្រទីប និងសំពះព្រះខែ ដែលត្រូវនឹងថ្ងៃទី៤ ខែវិច្ឆិកា ឆ្នាំ២០១៧នេះ សភាពការណ៍សន្តិសុខ សណ្តាប់ធ្នាប់ មានភាពល្អប្រសើរ ដែលមានប្រជាពលរដ្ឋមកចូលរួមកម្សាន្តសប្បាយប្រមាណពី១,៣លាននាក់ ទៅ១,៥លាននាក់ ដែលកើនឡើងច្រើនជាងថ្ងៃទី១ និងថ្ងៃទី២។
នេះបើតាមរបាយការណ៍របស់ គណៈកម្មាធិការជាតិរៀបចំបុណ្យជាតិ-អន្តរជាតិ បានបង្ហាញថា ចំពោះសភាពការណ៍សន្តិសុខសណ្តាប់ធ្នាប់ គឺមានឃាត់ខ្លួនជនជាតិប៊ែលហ្សិកម្នាក់ ពីបទមានកាំបិតខ្លីជាប់ខ្លួន បញ្ជូនទៅនាយកដ្ឋានអន្តោប្រវេសន៍ ដើម្បីអនុវត្តន៍នីតិវិធី។ បានឃាត់ខ្លួនចោរលួចឥវ៉ាន់១ករណីនៅផ្សារអ៊ីអន ។ ករណីបាត់ម៉ូតូ១គ្រឿង នៅតំបន់អា៥ កាលពីយប់ថ្ងៃទី៣ ប៉ុន្តែរកឃើញវិញដោយអ្នកផ្ញើម៉ូតូយកទៅរក្សាទុកនៅផ្ទះ និងករណីបាត់កាបូបលុយចំនួន២លើក។ ក្មេងវង្វេងម្តាយកើតឡើង៥៨លើក ស្មើនឹង៦០នាក់ ប៉ុន្តែត្រូវបានសមត្ថកិច្ចប្រកាសរកឃើញ និងប្រគល់ជូនអាណាព្យាបាលវិញ៥៧នាក់ នៅសល់តែ៣នាក់ មិនទាន់រកអាណាព្យាបាលឃើញ។ ផ្ទុះកំប៉ុងហ្គាស១លើក នៅតំបន់អា៣ បណ្តាលឲ្យរងរបួសស្ត្រីម្នាក់។ បានឃាត់ខ្លួនមនុស្ស៣នាក់ ដែលលក់អាវរងាមានអក្សរ Police និងArmy ដកហួតបានចំនួន៧អាវ ព្រមទាំងបានឃាត់ជនពាក់អាវនេះចំនួន ៣០៣ នាក់ (ស្រី២៧នាក់) ដោយអនុញ្ញាតឲ្យដើរកម្សាន្តវិញក្នុងតំបន់កម្សាន្តនានា បន្ទាប់ពីធ្វើការអប់រំណែនាំ និងធ្វើកំណត់ហេតុដកហួតរួច(៣០៣អាវ)។ ករណីនេះពុំមានប្រតិកម្មអវិជ្ជមានណាមួយពីសំណាក់ពលរដ្ឋដែលយើងបានអប់រំដកហួតអាវឡើយ។ បញ្ឈប់តំបន់កម្សាន្ត៤គោលដៅ ក្នុងតំបន់អា៩ ដែលដាក់ទឹកក្នុងបាឡុងបង្ហោះជាមួយចរន្តអគ្គិសនី ហើយស្រក់ទឹក ដែលអាចបណ្តាលឲ្យឆក់។
លោកឧត្តមសេនីយ៍ឯក បានបញ្ជាក់ថា តាមរយៈកិច្ចខិតខំប្រឹងប្រែងរបស់អាជ្ញាធរមានសមត្ថកិច្ចពាក់ព័ន្ធ ក្នុងករណីវិធានការរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាព បានធ្វើឲ្យស្ថានភាពទូទៅនៅថ្ងៃទី៣ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅតែមានលក្ខណៈល្អប្រសើរដោយពុំមានហេតុការណ៍ ព្រឹត្តិការណ៍អសន្តិសុខកើតឡើងបង្កភាពភ័យខ្លាច ឬមានផលប៉ះពាល់ដល់ទិដ្ឋភាពរួមនៃការប្រារព្ធពិធីឡើយ។ អាស្រ័យដោយអាកាសធាតុអំណោយផល បានជំរុញប្រជាពលរដ្ឋមកចូលកម្សាន្តសប្បាយនៅតាមគោលដៅនានា ក្នុងតំបន់ប្រារព្ធពិធី មានការកើនឡើងជាងថ្ងៃទីពីរ ដែលបណ្តាលបង្កឲ្យមានការកកស្ទះនៅគោលដៅមួយចំនួន ប៉ុន្តែក្រោមការសម្របសម្រួលដោះស្រាយពីអាជ្ញាធរមានសមត្ថកិច្ចដែលការពារនៅតាមគោលដៅនីមួយៗ បានធ្វើឲ្យយើងរក្សាបានសណ្តាប់ធ្នាប់ជាទូទៅ៕ ដោយ៖កូឡាប
