គណៈកម្មការមហាផ្ទៃ ការពារជាតិ និងមុខងារសាធារណៈនៃរដ្ឋសភា ដឹកនាំដោយ លោក ហ៊ុន ណេង ប្រធានគណៈកម្មការ បានបើកកិច្ចប្រជុំ ផ្ទៃក្នុងគណៈកម្មការ ដើម្បីពិនិត្យសិក្សាលើសេចក្ដីព្រាងច្បាប់ស្ដីពីសញ្ជាតិ នៅព្រឹកថ្ងៃទី២៤ ខែឧសភា ឆ្នាំ២០១៨ នៅវិមានរដ្ឋសភា។
សេចក្ដីព្រាងច្បាប់ស្ដីពីសញ្ជាតិ មាន១០ជំពូក ចែកចេញជា៣៨មាត្រា ជាការរៀបចំជាថ្មីដែលនឹងត្រូវយកទៅអនុវត្តជំនួសច្បាប់ស្តីពីសញ្ជាតិ(ចាស់) ត្រូវបានកិច្ចប្រជុំគណៈកម្មាធិការអចិន្ត្រៃយ៍រដ្ឋសភា កាលពីថ្ងៃទី២២ ខែឧសភា ឆ្នាំ២០១៨ សម្រេចប្រគល់ឱ្យគណៈកម្មការមហាផ្ទៃ ការពារជាតិ និងមុខងារសាធារណៈនៃរដ្ឋសភា សហការជាមួយគណៈកម្មការនីតិកម្ម និងយុត្តិធម៌នៃរដ្ឋសភា ធ្វើការពិនិត្យ និងសិក្សាស្រាវជ្រាវ ។
លោក ហ៊ុន ណេង បានមានប្រសាសន៍ថា សេចក្តីព្រាងច្បាប់ថ្មីនេះ ត្រូវបានតាក់តែងឡើងដោយឈរលើមូលដ្ឋានបី៖ ទីមួយ រក្សាទុកនូវបទប្បញ្ញត្តិ ទាំងឡាយនៃច្បាប់ស្តីពីសញ្ជាតិឆ្នាំ១៩៩៦ ដែលមានលក្ខណៈសមស្របក្នុងការអនុវត្ត ទីពីរ កែសម្រួលឬលុបចោលនូវបទប្បញ្ញត្តិទាំងឡាយណាដែល លែងមានលក្ខណៈសមស្របក្នុងការអនុវត្ត និងទីបី បន្ថែមបទប្បញ្ញត្តិថ្មីឱ្យស្របតាមការវិវត្តផែ្នកសេដ្ឋកិច្ច និងសង្គមកម្ពុជាបច្ចុប្បន្ន ដើម្បីពង្រឹងការ គ្រប់គ្រងកិច្ចការសញ្ជាតិឱ្យកាន់តែមានប្រសិទ្ធភាព សំដៅធានានូវសិទ្ធិរបស់ប្រជាពលរដ្ឋ ការពារសន្តិសុខ និងផលប្រយោជន៍របស់ជាតិ។
លោក ហ៊ុន ណេង បានមានប្រសាសន៍បន្តថា កិច្ចប្រជុំរបស់គណៈកម្មការទី៤នាពេលនេះ គឺជាកិច្ចប្រជុំផ្ទៃក្នុង ដោយគ្រាន់តែធ្វើការកែសម្រួល ខ្លឹមសារ និងពាក្យពេចន៍ខ្លះ ហើយនៅថ្ងៃទី២៨ ខែឧសភា ឆ្នាំ២០១៨ខាងមុខ គណៈកម្មការមហាផ្ទៃ ការពារជាតិ និងមុខងារសាធារណៈ រួមជាមួយ គណៈកម្មការនីតិកម្ម និងយុត្តិធម៌នៃរដ្ឋសភា នឹងអញ្ជើញតំណាងរាជរដ្ឋាភិបាលមកជួបប្រជុំពិភាក្សាគ្នាលម្អិតបន្ថែមទៀត មុននឹងបញ្ជូនសេចក្តីព្រាង ច្បាប់នេះ ទៅគណៈកម្មាធិការអចិន្ត្រៃយ៍រដ្ឋសភាវិញ ដើម្បីសម្រេចដាក់បញ្ចូលក្នុងរបៀបវារៈសម័យប្រជុំពេញអង្គនៃរដ្ឋសភា ៕ ដោយ៖បញ្ញាស័ក្តិ
