ស្ត្រីម្នាក់ត្រូវបានចាប់ខ្លួន បន្ទាប់ពីបញ្ចេញឥរិយាបទមិនសមរម្យបន្ទោរបង់ និងគប់លាមករបស់ខ្លួនដាក់ទៅលើបុគ្គលិក នៅក្នុងហាងអាហារលឿន Tim Hortons ស្ថិតនៅ Langley, British Coumbia, កាណាដា កាលពីថ្ងៃទី១៤ ខែឧសភា សប្តាហ៍មុននេះ ។
វីដេអូពីកាមេរ៉ាឃ្លាំមើលរបស់ហាងខាងលើនេះ បានបង្ហាញឲ្យឃើញខណៈពេលដែលស្ត្រីម្នាក់នោះ បានចាប់ផ្តើមបន្ទោរបង់ នៅទល់មុខកន្លែងគិតលុយ និងបន្ទាប់មក បានចាប់ច្បាមលាមករបស់ខ្លួន គប់ទៅលើបុគ្គលិកប្រុសម្នាក់តែម្តង បន្ទាប់ពីកើតមានជម្លោះខ្លាំងក្លាមួយជាមួយបុគ្គលិកនៅទីនោះ ។
ទាក់ទងនឹងករណីដ៏គួរឲ្យហួសចិត្តនេះផងដែរ ភ្លាមៗនោះ គេក៏ពុំដឹងច្បាស់មូលហេតុកើតឡើងបែបនេះទេ ប៉ុន្តែ អ្នកនាំពាក្យម្នាក់របស់ Tim Hortons បានបញ្ជាក់ថា រឿងរ៉ាវនេះបានកើតឡើង គឺដោយសារតែបុគ្គលិកនៅទីនោះ បានបដិសេធឲ្យនាងចូលប្រើប្រាស់បង្គន់ត្រូវបានចាក់សោរ ហើយខណៈនាងពុំមែនជាអតិថិជន ។
ដោយសារតែរឿងនេះហើយ ជាហេតុធ្វើឲ្យស្ត្រីនេះផ្ទុះកំហឹង និងចាប់ផ្តើមស្រាតខោបន្ទោរបង់ នៅទល់តុគិតលុយ រួចគប់លាមករបស់ខ្លួន និងព្រមទាំងក្រដាសកិត ទៅលើបុគ្គលិកនៅទីនោះយ៉ាងសាហាវតែម្តង ។
ប៉ូលីសបានបញ្ជាក់ថា ហេតុការណ៍នេះបានកើតឡើងនៅថ្ងៃច័ន្ទ (១៤ ឧសភា) ហើយថា ស្ត្រីរូបនោះក៏ត្រូវបានចាប់ឃុំខ្លួន នៅកន្លែងចតរថយន្តមួយ ប៉ុន្តែ ត្រូវបានដោះលែងវិញ បន្ទាប់ពីធ្វើកិច្ចសន្យាចំពោះមុខតុលាការ ៕ ចន្ទី