ប្រធានាធិបតីកូរ៉េខាងត្បូង Moon Jae-in និងមេដឹកនាំកូរ៉េខាងជើង Kim Jong-un បានឯកភាពរៀបចំកិច្ចចរចាជំនួបកំពូលជាន់ខ្ពស់នៅថ្ងៃទី០១ ខែមិថុនា ខាងមុខ ។
ទីភ្នាក់ងារផ្លូវការកូរ៉េខាងជើង KCNA ថ្មីៗនេះឲ្យដឹងថា នៅក្នុងជំនួបកំពូលកាលពីម្សិលមិញ ជាមួយប្រធានាធិបតីកូរ៉េខាងត្បូង Moon Jae-in មេដឹកនាំ Kim Jong-un បានអះអាងពីការសម្រេចចិត្តរបស់ខ្លួន ចំពោះសន្និសីទកំពូល ដែលតាមគំរោងប្រព្រឹត្តទៅខែមិថុនា នៅសិង្ហបុរី ជាមួយប្រធានាធិបតីអាមេរិក Donald Trump ។
តាម KCNA ជំនួបកំពូលលើកទី២នេះ រវាងមេដឹកនាំកូរ៉ខាងត្បូង និងខាងជើង ទទួលបានការឯកភាពគួរឲ្យរីករាយ ។ ប្រធានាធិបតីកូរ៉េខាងត្បូង Moon Jae-in និងមេដឹកនាំកូរ៉េខាងជើង Kim Jong-un បានឯកភាពរៀបចំកិច្ចចរចាជំនួបកំពូលរវាងប្រទេសទាំងពីរ នៅថ្ងៃទី០១ មិថុនា ខាងមុខ ។
មុននោះ វិមានប្រធានាធិបតីកូរ៉ខាងត្បូង ក៏បានបញ្ជាក់ថា មេដឹកនាំកូរ៉េទាំងពីរ បានឯកភាពចំពោះជំនួបកំពូលើកទី២នេះក្នុងរង្វង់១ខែកន្លងមក ។ ក្នុងជំនួបកំពូលលើកទី២ម្សិលមិញនេះ មេដឹកនាំទាំងពីរបានប្តូរយោបល់គ្នាត្រង់ៗ អំពីទស្សនៈ និងការអនុវត្តន៍ ជុំវិញខ្លឹមសារសេចក្តីថ្លែងការណ៍ Panmunjom ថ្ងៃទី២៧ មេសា ក៏ដូចជាសន្និសីទកំពូលអាមេរិក-កូរ៉េខាងជើង ដែលនឹងប្រព្រឹត្តទៅនៅថ្ងៃទី១២ ខែមិថុនា ៕ សូយន
