ភ្នំពេញ៖ ជីតាចុង បានចាប់រំលោភកុមារីអាយុ២ឆ្នាំ ខណៈម្តាយ យកមកផ្ញើឲ្យជួយមើលថែ ហើយទៅធ្វើការរោងចក្រ។ ក្រោយពីទទួលពាក្យបណ្តឹង ពីម្តាយកុមារីរងគ្រោះ នៅថ្ងៃទី២៦ខែឧសភា កម្លាំងនគរបាលប៉ុស្តិ៍ចោមចៅទី២ ក្រោមការបញ្ជាផ្ទាល់ពីលោក យឹម សារ៉ាន់ អធិការនគរបាលខណ្ឌពោធិ៍សែនជ័យ បានធ្វើការចុះឃាត់ខ្លួនជនសង្ស័យភ្លាមៗតែម្តង ដើម្បីយកមកសួនាំ និងបញ្ជូនទៅកាន់ផ្នែកជំនាញព្រហ្មទណ្ឌ នៃអធិការដ្ឋានខណ្ឌពោធិ៍សែនជ័យ កសាងសុំណុំរឿងបញ្ជូនទៅកាន់តុលាការ។
មន្ត្រីនគរបាលមូលដ្ឋាន បានឲ្យដឹងថា ក្មេងស្រីរងគ្រោះអាយុជាង២ឆ្នាំ មានម្តាយឈ្មោះ ផាត ចន្ធូ អាយុ២៤ឆ្នាំ មុនរបរកម្មការិនីរោងចក្រ ស្នាក់នៅបន្ទប់ជួលភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ មានស្រុកកំណើតនៅខេត្តតាកែវ។ ចំណែកឯជនសង្ស័យ ដែលត្រូវជាជីតាចុង ឈ្មោះ ជឹម ចយ អាយុ៥២ឆ្នាំ មុខរបរកម្មករសំណង់ ស្នាក់នៅក្បែរគ្នា មានស្រុកកំណើតនៅ ឃុំអូឫស្សី ស្រុកកំពង់ក្រឡាញ់ ខេត្តកំពង់ឆ្នាំង ដែលបានធ្វើសកម្មភាពរំលោភ ថ្ងៃទី២៥ ខែឧសភា នៅបន្ទប់ជួលក្នុងភូមិជ្រៃកោង សង្កាត់ចោចចៅ២ ខណ្ឌពោធិ៍សែនជ័យ។
បើតាមម្តាយកុមារីរងគ្រោះ បានឲ្យដឹងថា រូបគាត់បានចេញទៅធ្វើការរោងចក្រ ដោយយកកូនស្រីរងគ្រោះទៅផ្ញើម្តាយបង្កើត ឲ្យជួយមើលជារៀងរាល់ថ្ងៃ ដូចសព្វដង លុះមកដល់វេលាម៉ោង៥ល្ងាច បានចេញពីធ្វើការវិញ មកដល់បន្ទប់ជួល ស្រាប់តែឃើញកូនស្រី អង្គុយបត់ជើង ដោយមានប្រលាក់ឈាមហូរតាមប្រដាប់ភេទ ក៏បានសួរនាំកូនស្រីរបស់ខ្លួន ក៏បានបែកធ្លាយឪពុកចុងរបស់នាង ជាអ្នកចាប់រំលោភចៅស្រី ទើបនាំកូនស្រីមកដាក់ពាក្យបណ្តឹង នៅប៉ុស្តិ៍នគរបាលចោមចៅ២ ចុះឃាត់ខ្លួនជនសង្ស័យភ្លាមៗតែម្តង ៕ ដោយ៖បញ្ញាស័ក្តិ