តាម Reuter និងកាសែត Washington Post ចុះផ្សាយឲ្យដឹងថា មន្ត្រីអាមេរិកមួយក្រុមបានទៅកាន់កូរ៉េខាងជើង នៅថ្ងៃទី ២៧ ខែឧសភា ដើម្បីចរចាអំពីការត្រៀមបម្រុងជំនួបកំពូលរវាងប្រធានាធិបតីអាមេរិកដូណាល់ ត្រាំ និងមេដឹកនាំកូរ៉េខាងជើងគីម ជុងអ៊ុន ។
Washington Post បានដកស្រង់ប្រភពច្បាស់ការណ៍មួយឲ្យដឹងថា អតីតឯកអគ្គរដ្ឋទូតអាមេរិកប្រចាំកូរ៉េខាងជើង Sung Kim ដែលបច្ចុប្បន្នជាឯកអគ្គរដ្ឋទូតអាមេរិកប្រចាំហ្វីលីពីននោះ ត្រូវបានកោះហៅដើម្បីដឹកនាំកិច្ចការត្រៀមបម្រុងទាំងនេះ ។
នៅថ្ងៃទី ២៦ ខែឧសភា ថ្លែងនៅសេតវិមាន លោកត្រាំ បានលើកឡើងច្បាស់ថា ៖ “យើងខ្ញុំ កំពុងធ្វើការយ៉ាងល្អ អំពីជំនួបកំពូលជាមួយកូរ៉េខាងជើង ។ អ្វីៗកំពុងប្រព្រឹត្តទៅល្អប្រសើរ ។ យើងខ្ញុំកំពុងបែរចក្ខុឆ្ពោះទៅថ្ងៃទី ១២ ខែមិថុនា នៅសិង្ហបុរី ។ គ្មានអ្វីផ្លាស់ប្តូរ យើងនឹងរង់ចាំមើលរឿងអ្វីនឹងកើតឡើង” ។
ប្រធានាធិបតីត្រាំ ក៏បានឲ្យដឹងថា កិច្ចចរចារវាងអាមេរិក-កូរ៉េខាងជើង កំពុងលូតលាស់ល្អ ។
ខណៈពេលនោះដែរទីភ្នាក់ងារព័ត៌មានកណ្តាលរបស់កូរ៉េខាងជើង KCNA ឲ្យដឹងថា ៖ ក្នុងជំនួបកំពូលប្រថុចញ៉ុចមួយជាមួយប្រធានាធិបតីកូរ៉េខាងត្បូង Moon Jae-in នៅថ្ងៃនោះដែរ នាភូមិផ្អាកសង្គ្រាម Panmunjom មេដឹកនាំកូរ៉េខាងជើង គីមជុងអ៊ុន បានសម្តែងការត្រៀមខ្លួនជាស្រេចដើម្បីជួបជាមួយប្រធានាធិតបីអាមេរិកដូណាល់ ត្រាំ ៕ សូយន