ករណីប្អូនប្រុសនាយ ពែកមី ត្រូវបានរថយន្តគេបុកបណ្តាលឲ្យរងរបួសយ៉ាងធ្ងន់ធ្ងរស្ទើរតែបាត់បង់ជីវិត រហូតមកទល់ពេលនេះមានរយៈពេលជិត ២០ ថ្ងៃ ហើយ ខណៈជនបង្កពុំទាន់ចាប់ខ្លួននៅឡើយ ដោយចាប់ឃាត់បានតែរថយន្ត ។ ប៉ុន្តែ ទោះយ៉ាងណា គ្រួសារជនរងគ្រោះមិនទាន់ទទួលបានដោះស្រាយសមស្រប ពីសំណាក់សមត្ថកិច្ចខណ្ឌប្ញស្សីកែង នៅឡើយទេ បន្ទាប់ពីអធិការខណ្ឌបានបញ្ជើញឪពុកជនរងគ្រោះទៅចរចាដើម្បីបញ្ចប់រឿង ជាមួយសំណង ៤ ពាន់ដុល្លារ ប៉ុន្តែ គ្រួសារជនរងគ្រោះពុំយល់ព្រមទទួលនោះទេ កាលពីថ្ងៃទី២៦ ខែឧសភា ឆ្នាំ២០១៨ ។
ទាក់ទងនឹងករណីនេះផងដែរ ឪពុកជនរងគ្រោះបានថ្លែងក្នុងវីដេអូបញ្ជាក់ថា៖ «កាលពីល្ងាចម៉ោង ៣ គេបានហៅពួកខ្ញុំទៅសម្រួល ដើម្បីអធិការខណ្ឌសរសេរក្នុងកំណត់ហេតុ ខាងភាគីរថយន្តមានសន្តានចិត្តជួយចេញថ្លៃព្យាបាលទៅភាគីម៉ូតូដែលជិះបុកជញ្ជាំងខ្លួនឯង ៤ពាន់ដុល្លារ» ។ ការសរសេរលើកឡើងបែបនេះ បានធ្វើឲ្យនាយ ពែកមី ប្រតិកម្មដោយបញ្ជាក់ថា៖ «នេះជាករណីអំពើមនុស្សឃាត ជិះឡានដេញបុក តែសមត្ថកិច្ចបែរជាខាងភាគីបង្កមានសន្តានចិត្តជួយទៅវិញ ។ ពួកខ្ញុំពុំអាចទទួលយកការចរចាសម្រួលរបស់អធិការខណ្ឌបានទេ ព្រោះពួកខ្ញុំបានចំណាយថ្លៃការព្យាបាលអស់ជិត ១ ម៉ឺនដុល្លារ ទៅហើយ ទាំងនៅខ្មែរ និងវៀតណាម» ។
សូមបញ្ជាក់ថា ករណីខាងលើនេះ ត្រូវបានគេដឹងថា បានកើតឡើងនៅចំណុចច្រកចូលអាងទឹក បុរីពិភពថ្មី សង្កាត់ច្រាំងចំរេះ២ ខណ្ឌឬស្សីកែវ ភ្នំពេញ ។ ក្រោយកើតហេតុភ្លាមៗ ជនរងគ្រោះត្រូវបានដឹកទៅសង្គ្រោះនៅមន្ទីរពេទ្យកាល់ម៉ែត្រ រួចក្រុមគ្រួសារក៏បានទៅដាក់ពាក្យប្ដឹងនៅប៉ុស្ដិ៍សមត្ថកិច្ចខណ័ឬស្សីកែវ ៕ ចន្ទី
