ភ្នំពេញ ៖ ទិវាបរិស្ថានជាតិ និងបរិស្ថានពិភពលោក ៥មិថុនា ត្រូវបានប្រារព្ធឡើង ក្នុងគោលបំណងលើកកម្ពស់ការយល់ដឹងជាសាធារណៈអំពីការគ្រប់គ្រង និងប្រើប្រាស់ធនធានធម្មជាតិប្រកបដោយនិរន្តរភាព ការប្រយុទ្ធប្រឆាំងនឹងការប្រែប្រួលអាកាសធាតុ និងការគ្រប់គ្រងគុណភាពបរិស្ថាន។
បើតាមសេចក្តីជូនដំណឹង របស់ក្រសួងបរិស្ថាន លោកសាយ សំអាល់ រដ្ឋមន្ត្រីក្រសួងបរិស្ថាន កាលពីថ្ងៃទី២៥ ខែឧសភា ឆ្នាំ២០១៨ បានបញ្ជាក់ថា ទិវានេះ សំដៅលើការលើកកម្ពស់សុខភាពសាធារណៈ ការគាំពារបរិស្ថាន ការអភិរក្សជីវៈចម្រុះ ការគ្រប់គ្រង់ធនធានធម្មជាតិប្រកបដោយនិរន្តរភាព និងការបំផុសចលនាប្រជាពលរដ្ឋ ព្រះសង្ឃ កងកម្លាំង ប្រដាប់អាវុធ មន្ត្រីរាជការ គ្រប់ជាន់ថ្នាក់ សិស្ស និស្សិត គ្រឹះស្ថានសិក្សាវិស័យឯកជន សង្គមស៊ីវិល ដៃគូអភិវឌ្ឍន៍ជាតិនិងអន្តរជាតិ ឲ្យចូលរួមទាំងស្មារតី និងសម្ភារៈ ក្នុងការផ្សារភ្ជាប់ ទំនាក់ទំនងជាមួយធម្មជាតិ និងកែលម្អគុណភាព សោភ័ណភាពទីក្រុង ទីប្រជុំជន ជនបទ ភូមិដ្ឋាន វត្តអារ៉ាម សាលារៀន មន្ទីរពេទ្យ រោងចក្រ សហគ្រាស ទិផ្សារ មជ្ឈមណ្ឌលសេដ្ឋកិច្ច។ល។
សូមបញ្ជាក់ថា ទិវាបរិស្ថានពិភពលោក ត្រូវបានបង្កើតឡើងដោយមហាសន្និបាទអង្គការសហប្រជាជាតិ ក្នុងឆ្នាំ១៩៧២ ដើម្បីជានិម្មិតរូបនៃការប្រារព្ធសន្និសីទស្តុកខូមស្តីពី បរិស្ថានមនុស្សជាតិ គឺស្របពេលដែលមហាសន្និបាតសម្រេចបង្កើត កម្មវិធីបរិស្ថានសហប្រជាជានិត ។ ទិវាបរិស្ថានពិភពលោកត្រូវបានអង្គការសហប្រជាជាតិ កំណត់យកថ្ងៃទី៥ ខែមិថុនា សម្រាប់ការប្រារព្ធជារៀងរាល់ឆ្នាំ ដើម្បីលើកកម្ពស់ការយល់ដឹងពីបរិស្ថាននៅទូទាំងពិភពលោក។ ចំណែករាជរដ្ឋាភិបាលកម្ពុជា បានសម្រេចកំណត់យកថ្ងៃទី៥ ខែមិថុនា ជាទិវាបរិស្ថានជាតិ តាមរយៈអនុក្រឹត្យលេខ១៥ អនក្រ.បក ចុះថ្ងៃទី២៤ខែមេសា ឆ្នាំ១៩៩៦ ដើម្បីឲ្យត្រូវគ្នានឹងថ្ងៃប្រារព្ធ ទិវាបរិស្ថានពិភពលោក។ ការរៀបចំទិវាបរិស្ថានជាតិ និងបរិស្ថានពិភពលោក ត្រូវរៀបចំឡើងជារៀងរាល់ឆ្នាំនៅតាមរាជធានី ខេត្ត ស្របតាមប្រធានបទប្រចាំឆ្នាំនីមួយៗ ដែលកំណត់ដោយកម្មវិធីបរិស្ថានសហប្រជាជាតិ។
លោករដ្ឋមន្ត្រី ក៏បានអំពាវនាវដល់រដ្ឋបាលរាជធានី ខេត្ត ក្រុង ស្រុក ខណ្ឌ ឃុំ សង្កាត់ សូមចូលរួមផ្សព្វផ្សាយដល់ប្រជាពលរដ្ឋ ជំរុញការចូលរួមក្នុងការធ្វើអនាម័យ ការដាំដើមឈើ និងការគ្រប់គ្រង ទុកដាក់និងវេចខ្ចប់សំណល់រឹង សំរាម ក្នុងធុងសំរាម ឬនៅតាមទី តាំងកំណត់ឲ្យបានត្រឹមត្រូវ ចៀសវាង ការដុត ឬបោះចោលមិនត្រឹមត្រូវតាមលក្ខណៈបច្ចេកទេស ដែលអាចបង្កការប៉ះពាល់ដល់សុខភាពមនុស្ស សត្វ និងគុណភាពបរិស្ថាន។ រមណីយដ្ឋាន មជ្ឈមណ្ឌលកម្សាន្ត ភោជីនយដ្ឋាន និងអាហារដ្ឋាន ត្រូវយកចិត្ត ទុក ដាក់លើការសន្សំសំចៃថាមពល ចូលរួមការពារ ថែរក្សាជីវៈចម្រុះ និងធនធានធម្មជាតិ ចូលរួមធ្វើអនាម័យ និងគ្រប់គ្រងសំណល់រឹង សំរាម សំណល់រាវ ឲ្យបានត្រឹមត្រូវ និងចូលរួមផ្សព្វផ្សាយទៅតាមទិសដៅ និងគោលនយោបាយសំខាន់ៗ ពាក់ព័ន្ធនឹងវិស័យបរិស្ថាន ដើម្បីបំផុសចរន្តចូលរួមជាសកល៕ ដោយ៖បញ្ញាស័ក្តិ
