ភ្នំពេញ ៖ ទីតាំង ស្តុបនិងចិញ្ចឹមគោក្របី សេះ សម្រាប់កាប់ យកសាច់លក់ជាច្រើនទីតាំងនៅក្នុងភូមិដើមគ សង្កាត់ជ្រោយចង្វា ខណ្ឌជ្រោយចង្វា ជាពិសេសកុងស៊ីកាប់គោរបស់លោក ហ៊យ ហៀង ត្រូវបានប្រជាលរដ្ឋជាច្រើនគ្រួសារ លើកឡើងថា បានជះក្លិនស្អុយអសោចប៉ះពាល់បរិស្ថាន និងការរស់នៅរបស់ពួកគាត់យ៉ាងធ្ងន់ធ្ងរ ។
ប្រជាពលរដ្ឋជាច្រើនគ្រួសារ បានអោយដឹងថា ទីតាំងស្តុបគោ សត្វគោ ក្របីសេះសម្រាប់កាប់យកសាច់លក់ មានជាច្រើនកន្លែងជាពិសេសកុងស៊ីកាប់គោរបស់លោក ហ៊យ ហៀង នៅក្នុងភូមិដើមគ សង្កាត់ជ្រោយចង្វា ជាប់នឹងតំបន់អភិវឌ្ឍន៍ទីក្រុងរណបជ្រោយចង្វា កំពុងតែបង្កផលប៉ះពាល់ដល់បរិស្ថាន ធុំក្លិយស្អុយ អសោច និងបង្កជាជំងឺឆ្លងដល់មនុស្ស សត្វ និងការរស់ នៅរបស់អ្នកភូមិជាខ្លាំង ។ ដោយសារតែប៉ះពាល់ដល់បរិស្ថានយ៉ាងធ្ងន់ធ្ងរបែបនេះ ប្រជាពលរដ្ឋជាច្រើនគ្រួសារ រស់នៅជុំវិញតំបន់នោះបាននាំគ្នាធ្វើការអង្វរយ៉ាងទទូចដើម្បីអោយមន្ត្រីជំនាញ ក៏ដូចជាអាជ្ញាធរខណ្ឌ អាជ្ញាធររាជធានីភ្នំពេញដើម្បីចុះត្រួតពិនិត្យ និងមានវិធានការណ៍ ដោយពួកគាត់សំណូមពរ ដល់ម្ចាស់ទីតាំងកាប់គោ លោកហ៊យ ហៀង ប្តូរទីតាំងទៅកន្លែងផ្សេង ឱ្យឆ្ងាយពីភូមិឋានពួកគាត់រស់នៅ ។
ប្រជាពលរដ្ឋ បានអះអាងទៀតថា អាជីវកម្ម ចិញ្ចឹម ស្តុកសត្វគោក្របីទាំងអស់នេះ គឺពុំមានច្បាប់អនុញ្ញាតឡើយ ហើយទីតាំងចិញ្ចឹមគោនោះ ពុំមានលក្ខណៈបចេ្ចកទេសនិងអនាម័យគ្រប់គ្រាន់ទេ ដែលកំពុងតែប៉ះពាល់ យ៉ាងធ្ងន់ធ្ងរដល់បរិស្ថាន និងមានជំងឺងាប់ រាលដាលទៅសត្វផ្សេងៗទៀត។
ពួកគាត់បន្តថា សត្វគោ ក្របី សេះ ដែលគេចិញ្ចឹមស្តុកទុក ចូលកាប់ក្នុងកុងស៊ីលោកហ៊យ ហៀង នោះ ពេលថ្ងៃគេលែងឱ្យចេញរកស៊ីប្រសេកប្រសាចពេញផ្លូវ ពេញសួនច្បារ ក្នុងខណ្ឌជ្រោយចង្វា បង្កជាគ្រោះថ្នាក់ចរាចរ រថយន្ត ម៉ូតូ បុកស្ទើររាល់ថ្ងៃ ធ្វើឱ្យមានមនុស្សរបួសធ្ងន់ធ្ងរ ជាញឹកញាប់ ហើយរាល់គ្រោះថ្នាក់ចរាចរម្តងៗ លោកហ៊យ ហៀង មិនដែលចេញមុខ មកទទួលខុសត្រូវឡើយ ។ ប្រការនេះ អាជ្ញាធរក៏ធ្លាប់បានណែនាំ ដល់ម្ចាស់កុងស៊ីកាប់គោនោះដែរ តែដូចជាគ្មានប្រសិទ្ធភាពសោះ ។
ប្រជាពលរដ្ឋបានឱ្យដឹងទៀតថា ទីតាំងចិញ្ចឹម និងស្តុកសត្វគោ ក្របី នៅភូមិដើមគមួយចំនួន មិនបានចូលកាប់នៅក្នុងកុងស៊ីទេ គឺគេកាប់នៅក្រៅកុងស៊ី តែគេនៅតែបង់លុយ ឱ្យទៅលោកហ៊យ ហៀង ជាម្ចាស់កុងស៊ីដដែល។ ការដែលលោកហ៊យ ហៀង អនុញ្ញាតឱ្យមានការកាប់គោ ក្របី ក្រៅទីសត្តឃាត យ៉ាងអានាធិបតេយ្យនេះហើយ គឺបង្កឱ្យមានផលអវិជ្ជមានគ្រប់បែបយ៉ាង ។
ជាមួយករណីនេះអាជ្ញាធរខណ្ឌជ្រោយចង្វា មិនអនុញ្ញាតឲ្យទីតាំងកុងស៊ី កាប់គោ ដែលកំពុងធ្វើអាជីវកម្មសព្វថ្ងៃនេះ ដំណើរការទៀតឡើយ នៅក្នុងទីក្រុង ព្រោះកុងស៊ីកាប់គោបច្ចុប្បន្ន មានទីធ្លាតូចចង្អៀត និងជះក្លិនស្អុយ ប៉ះពាល់ផ្នែកបរិស្ថានជុំវិញនោះ យ៉ាងខ្លាំង ពិសេសប៉ះពាល់យ៉ាងធ្ងន់ធ្ងរ ដល់ការរស់នៅ របស់បងប្អូនប្រជាពលរដ្ឋតែម្ដង ។ បញ្ហាអនាម័យ បរិស្ថាននិងសន្តិសុខ នៅក្នុងកុងស៊ី រួមទាំងទឹកស្អាតផង តម្រូវឱ្យ លោកហ៊យ ហៀង រៀបចំឡើងវិញឱ្យល្អ មិនត្រូវរស់នៅបែបគ្មានអនាម័យ ដូច្នេះទេ ព្រោះវាមានក្លិនស្អុយណាស់ ងាយនឹងចម្លងមេរោគផ្សេងយ៉ាងខ្លាំង ប៉ុន្តែមកដល់ពេលនេះ មានរយៈពេល២ឆ្នាំ ហើយម្ចាស់កុងស៊ី មិនបានអនុវត្តន៍ តាមការណែនាំ របស់លោកអភិបាលខណ្ឌឡើយ គឺបន្តអាជីវកម្មរបស់ខ្លួន យ៉ាងព្រងើយ មិនក្រែងរអែង នឹងអាជ្ញាធរនោះទេ ៕ ដោយ ៖ បញ្ញាស័ក្តិ
