Lei Zhiqiang មន្ត្រីថ្នាក់ទាបម្នាក់ នៅខេត្ត Gansu ប្រទេសចិន ប្រមែប្រមូលសំណូកដល់ទៅ 9,2 ពាន់លានយាន់ (ប្រមាណ1.44 ពាន់លាន USD) តាមរយៈសំណូកសូកប៉ាន់-នេះបើតាមរបាយការណ៍ចុះថ្ងៃទី ១៤ ខែឧសភា របស់កាសែត Caixin Weekly ។
Lei Zhiqiang អតីតប្រធានសហករឥណទានជនបទ ខេត្ត Gansu ប្រទេសចិន ។
នៅពេលប្រមូលទ្រព្យសម្បត្តិរបស់មន្ត្រីនេះ នៅគេហដ្ឋានឯកជនគេប្រើរថយន្តធុនធំដល់ទៅ ២គ្រឿង ដើម្បីដឹកវត្ថុបុរាណត្រូវបានទិញដោយទឹកប្រាក់ដែលមន្ត្រីនេះ បានកេងប្រវ័ញ្ច ។
តាម Caixin នោះទ្រព្យសម្បត្តិនៅគេហដ្ឋានឯកជនបង្ហាញឲ្យឃើញថា Lei អតីតប្រធានសហករឥណទានជនបទ នៅខេត្ត Gansu ពិតជាមានជីវភាពរស់នៅមួយ “មហារុងរឿង” ។
កុំថាឡើយប្រជាជន សូម្បីតែមន្ត្រីគ្រាក់ៗនៅក្រុងប៉េកាំង ក៏រងការរន្ធត់ពេលឃើញទម្រង់ពុករលួយមហាធំធេងរបស់មន្ត្រីថ្នាក់ឃុំម្នាក់ ។ ពិសេសខេត្ត Gansu ជាតំបន់ដាច់ស្រយាល ហើយអន់ថយ ស្ថិតនៅភាគពាយ័ព្យប្រទេសចិន ។
ក្នុងពីការស៊ើបអង្កេត លោក Lei ឆ្លើយសារភាពថា ខ្លួនលោករកបានលុយជាង ២០០លានយាន់ (ប្រហែល 31,3លានដុល្លារ) ដែលជាលុយមិនស្របច្បាប់ ហើយត្រូវបានរដ្ឋអំណាចរកឃើញ។ ចំណែកលុយ ៩ពាន់លានយាន់ទៀត (ប្រហែល ១,៤ពាន់លានដុល្លារ) បានលាក់ទុកក្នុងគណនេយ្យដែលអ្នកដទៃឈរឈ្មោះ។
ការចោទប្រកាន់ទាំងឡាយចំពោះលោក Lei ត្រូវបានការិយាល័យអយ្យការទីក្រុង Qingyang ខេត្ត Gansu ធ្វើការចោទប្រកាន់កាលពីខែកុម្ភៈកន្លងមក ។ អយ្យការបានចោតប្រកាន់ថា លោក Lei បានទទួលប្រាក់សំណូកយ៉ាងច្រើន បង្កប់ចូលក្នុងទ្រព្យសម្បត្តិដែលពុំមាន ឫគល់ច្បាស់លាស់ ។
Lei Zhiqiang កើតនៅឆ្នាំ ១៩៥៨ នាទីក្រុង Wushan ខេត្ត Gansu ហើយមុននេះ ធ្លាប់ធ្វើជាអនុប្រធានក្រុង Tianshui លេខាបក្សក្រុង ហើយជានាយកដ្ឋានហិរញ្ញវត្ថុ ។
ស្ថាប័នប្រឆាំងអំពើពុករលូយប្រកាសថា លោក Lei ត្រូវបានស៊ើបអង្កេតតាំងពីខែមេសា ឆ្នាំ ២០១៧ មកម្លេះ ៕ សូយន