តាម Korea Herald, មន្ត្រីជាន់ខ្ពស់ម្នាក់របស់កូរ៉េខាងជើង បានទៅដល់កូរ៉េខាងជើង កាលពីថ្ងៃចន្ទទី ២៨ ខែឧសភា តែបើតាមប្រភពការទូតនៅទីនោះឲ្យដឹងថា មន្ត្រីនេះបានធ្វើដំណើរឆ្លងកាត់ប៉េកាំង ដើម្បីឆ្ពោះទៅកាន់សិង្ហបុរី។
រថយន្តមួយគ្រឿងរបស់ស្ថានទូតកូរ៉េខាងជើង ត្រូវបានសំឡឹងឃើញនៅព្រលានយន្តហោះប៉េកាំង។
ប្រភពដដែលឲ្យដឹងថា មន្ត្រីរូបនេះបានដឹកនាំប្រតិភូរបស់កូរ៉េខាងជើង ដើម្បីជួបប្រជុំជាមួយក្រុមការងារអាមេរិក សំដៅពិភាក្សាបញ្ហាភស្តុភា និងសន្តិសុខ នៃការប្រព្រឹត្តទៅជំនួបកំពូលថ្ងៃទី ១២ ខែមិថុនា ខាងមុខនេះ ។
ប្រភពពីប្រព័ន្ធផ្សព្វផ្សាយជប៉ុន និងកូរ៉េខាងត្បូង ឲ្យដឹងថា មន្ត្រីកូរ៉េខាងជើង ដែលមានវត្តមាននៅប៉េកាំង តាំងពីថ្ងៃទី ២៤-២៦ ខែឧសភា គឺលោក Kim Chang Son មេដឹកនាំក្រុមជំនួយការរបស់លោក គីម ជុងអ៊ុន ។
លោក Kim Chang Son
ក្រុមការងាររបស់អាមេរិកដឹកនាំដោយអនុប្រធានខុទ្ទការល័យសេតវិមាន Joe Hagin ក៏ត្រូវបានដឹងថា កំពុងធ្វើដំណើរមកកាន់សិង្ហបុរីផងដែរ ។
បើតាម វ៉ាស៊ីនតោន ប៉ុស្តិ៍ កាលពីថ្ងៃទី ២៧ ខែឧសភា ឯកអគ្គរដ្ឋទូតអាមេរិកប្រចាំហ្វីលីពីន លោក Sung Kim ត្រូវបានកោះហៅ ដើម្បីដឹកនាំប្រតិភូមួយទៅកាន់កូរ៉េខាងជើងតាំងពីថ្ងៃទី ២៧ ខែឧសភា ៕ សូយន