កណ្តាល ៖ កម្លាំងជំនាញការិយាល័យព្រហ្មនគរបាលទណ្ឌកម្រិតស្រាល បានប្រតិបត្តិការស្រាវជ្រាវបង្ក្រាបទីតាំងបើកល្បែងអាប៉ោងខុសច្បាប់មួយកន្លែង នៅថ្ងៃទី២៨ ខែឧសភា ឆ្នាំ២០១៨ វេលាម៉ោង១៣និង៣០នាទី នៅចំណុច ផ្ទះឈ្មោះ ប៉ែន ថុលដែលជាម្ចាស់ផ្ទះ ភូមិទួលដូង ឃុំគគីរ ស្រុកកៀនស្វាយ ខេត្តកណ្ដាល។
លោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាល បានឲ្យដឹងថា ក្នុងប្រតិបត្តិការនេះ កម្លាំងជំនាញបានឃាតខ្លួនជនសង្ស័យ៦នាក់រួមមានទី១-ឈ្មោះ ស៊ិន គុន ភេទប្រុស អាយុ ៦៦ឆ្នាំ ទីលំនៅបច្ចុប្បន្នភូមិចំបក់ ឃុំជ្រៃ ស្រុកកំពង់ត្របែក ខេត្តព្រៃវែង ទី២-ឈ្មោះ សុខ ជា ភេទប្រុស អាយុ ៥០ឆ្នាំ ទីលំនៅបច្ចុប្បន្នភូមិច្រកចំបក់ ឃុំជ្រប់ ស្រុកត្បូងឃ្មុំ ខេត្តត្បូងឃ្មុំ ទី៣-ឈ្មោះ ដង យ៉ឹងហ្វាង ភេទប្រុស អាយុ ៤៩ឆ្នាំ ទីលំនៅបច្ចុប្បន្នភូមិកំពង់ចម្លង ឃុំព្រែកទន្លាប់ ស្រុកលើកដែក ខេត្តកណ្ដាល ទី៤-ឈ្មោះ ផល ស៊ីដារ៉ា ភេទប្រុស អាយុ ៣០ឆ្នាំ ទីលំនៅបច្ចុប្បន្នភូមិតារាប ឃុំគគីរ ស្រុកកៀនស្វាយ ខេត្តកណ្ដាល ទី៥-ឈ្មោះ ឆាយ ហុក ភេទប្រុស អាយុ ៤០ឆ្នាំ ទីលំនៅបច្ចុប្បន្នភូមិព្រែកតាអុង ឃុំពាមឧញ៉ាអុង ស្រុកល្វាឯម ខេត្តកណ្ដាល និងទី៦-ឈ្មោះ ឆោម ឆៃយ៉ា ភេទប្រុស អាយុ ៣៥ឆ្នាំ ទីលំនៅបច្ចុប្បន្នភូមិតារាប ឃុំគគីរ ស្រុកកៀនស្វាយ ខេត្តកណ្ដាល។ វត្ថុតាងចាប់យក ៖មេអាប៉ោង៨ និង ប្រដាប់ខាតជើងអាប៉ោង មួយសន្លឹក គម្របមួយ កម្រាលអាប៉ោងមួយ ទូរស័ព្ទដៃស៊េរីទំនើប ៧គ្រឿង លុយដុល្លារ ៨៧៥ដុល្លារ លុយខ្មែរ ៣.៧០០.០០០រៀល រថយន្ត២គ្រឿង ម៉ាកកាមរីបាឡែន ស្លាកលេខ ភ្នំពេញ 2V-7570 ពណ៌ស្ក ម៉ាកការមីឆ្លាម ស្លាកលេខ ភ្នំពេញ 2Q-7796 ពណ៌ទឹកប្រាក់។
លោកឧត្តមសេនីយ៍ទោបន្តថា កម្លាំងជំនាញបានទទួលព័ត៌មាន ពីប្រជាពលរដ្ឋថា មានសកម្មភាពលេងល្បែងស៊ីសង នៅចំណុចផ្ទះឈ្មោះ ប៉ែន ថុល ភូមិទួលដូង ឃុំគគីរ ស្រុកកៀនស្វាយ ខេត្តកណ្ដាល។ ក្រោយពីទទួលព័ត៌មានភ្លាម សមត្ថកិច្ចនគរបាលព្រហ្មទណ្ឌកម្រិតស្រាលខេត្តកណ្ដាល ក្រោមបញ្ជាផ្ទាល់របស់លោកឧត្តមសេនីយ៍ទោស្នងការ បានចុះទៅដល់កន្លែងកើតហេតុ បង្ក្រាបបានជនសង្ស័យ៦នាក់ រួមនិងវត្ថុតាងបញ្ជូនមកការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តកណ្ដាល ដើម្បីបន្តចាត់ការ តាមនីតិវិធី ហើយជនសង្ស័យកម្លាំងជំនាញកំពុងកសាងសំណុំរឿងបញ្ជូនទៅសាលាដំបូងខេត្ត៕ ដោយ៖បញ្ញាស័ក្តិ
