ជាការពិតណាស់ ក្តីស្រលាញ់របស់ម្តាយ គឺស្តែងឡើងពីទឹកចិត្តដ៏បរិសុទ្ធ និងគ្មានលក្ខខណ្ឌឡើយ ព្រោះតែម្តាយនឹងលះបង់អ្វីៗគ្រប់យ៉ាង ក៏ព្រោះតែដើម្បីផលប្រយោជន៍ដល់កូនៗ ។ ប៉ុន្តែ គួរឲ្យសោកស្តាយ និងហួសចិត្តខ្លាំងណាស់ ដែលស្ត្រីជនជាតិចិនម្នាក់នេះ បែរធ្វើមានចិត្តគំនិតផ្ទុយស្រឡះ ដោយលក់កូនស្រីរបស់ខ្លួន ដើម្បីយកលុយទៅទិញផលិតផល និងរបស់របរប្រាស់ សម្រាប់តុបតែងខ្លួន (make-up) ។
យោងតាម Shanghaiist ស្ត្រីម្នាក់ឈ្មោះថា Yu បានទៅកាន់ប៉ុស្តិ៍ប៉ូលីស នៅទីក្រុង Zhengzhou នៃខេត្ត Henan ប្រទេសចិន ដើម្បីដាក់ពាក្យបណ្តឹងអំពីកូនស្រីអាយុ១ឆ្នាំរបស់នាង ដែលបានបាត់ខ្លួនឈ្មោះ HuaHua ។
Yu ដែលមកពីខេត្ត Yunnan បាននិយាយថា នាងបានទៅកាន់ខេត្ត Henan ក្នុងគោលដៅដើរលេងកម្សាន្ត ។ នៅពាក់កណ្តាលនៃការលេង Yu ស្រាប់តែបាត់កូនស្រីអាយុ ១ ឆ្នាំ របស់នាង នៅក្នុងស្ថានីយរថភ្លើង ។
ទោះយ៉ាងណា ក្រោយរយៈពេល ១០ ម៉ោង នៃការស៊ើបអង្កេត ប៉ូលីសបានរកឃើញថា ក្មេងស្រីតូចនោះពិតជាពុំបាត់ខ្លួនទេ ប៉ុន្តែ ផ្ទុយទៅវិញ នាងតូចត្រូវបានលក់ដោយម្តាយរបស់នាងផ្ទាល់តែម្តង ។
ប្រឈមនឹងទង្វើដ៏រន្ធត់របស់ខ្លួន ស្ត្រីជាម្តាយរូបនេះ បានសម្រេចសារភាពថា នាងបានលក់កូនស្រីក្នុងតម្លៃ ៥០,០០០ យ័ន (៧៨០០ ដុល្លារ) នៅពេលដែលនាងបានមកដល់ក្នុងទីក្រុង Zhenzhou ។
បន្ទាប់ពីលក់កូនស្រីបានជោគជ័យ Yu ក៏បានចំណាយលុយ ៦ ពាន់យ័ន ដើម្បីទិញគ្រឿងសំអាង និងផលិតផលផ្សេងតុបតែងខ្លួនផ្សេងៗ ។
នៅថ្ងៃទី២៣ ខែឧសភា ឆ្នាំ២០១៨ ប៉ូលីសបានតាមដាន និងជួយសង្គ្រោះក្មេងស្រីតូចពីសោកនាដកម្មដែលម្តាយរបស់នាងបានធ្វើ និងប្រគល់នាងទៅឲ្យឪពុករបស់នាង ។ គេក៏សង្ឃឹមថា ឪពុករបស់នាងនឹងមើលថែនាងបានល្អប្រសើរ ៕ ចន្ទី