កណ្តាល៖ រយៈពេលប្រមាណជាង១សប្តាហ៍មកហើយ ដែលប្រជាពលរដ្ឋចំនួន២ឃុំ មានឃុំសំរោងធំ និងឃុំគគីរធំ ស្រុកកៀនស្វាយ ខេត្តកណ្ដាល បានប្រមូលផ្តុំគ្នាធ្វើការតវ៉ា ហើយនៅថ្ងៃទី២៨ ខែឧសភា ឆ្នាំ២០១៨ ក៏បានប្រមូលផ្តុំគ្នាធ្វើការតវ៉ាជាថ្មីទៀត ដោយទទូចស្នើសុំដល់អាជ្ញាធរ និងមន្ត្រីជំនាញ ជាពិសេសសម្តេចតេជោ ប្រមុខរាជរដ្ឋាភិបាល ជួយអន្តរាគមន៍ដោះស្រាយជម្លោះដីធ្លីរបស់ពួកគាត់ បន្ទាប់ពីក្រុមហ៊ុន ផាន អ៊ីម៉ិច បានយកគ្រឿងចក្រទៅកាយផ្តាច់ផ្លូវ និងបានបំពានដីរបស់ពួកគាត់។
ប្រជាពលរដ្ឋបានលើកឡើងថា ដីបង្កបង្កើនផលរបស់ពួកគាត់ មានប្រមាណជាង៥០ហិកតា កំពុងរងការរំលោភទន្ទ្រានយ៉ាងខ្លាំងខ្លា ពីសំណាក់ក្រុមហ៊ុន ផាន អ៊ីម៉ិច ដោយបានប្រើគ្រឿងចក្រឈូសឆាយផ្ដាច់ផ្លូវ និងលើកជាទំនប់បំពានយកតែម្តង។ គិតត្រឹមរសៀលថ្ងៃទី២៨ ខែឧសភា ឆ្នាំ២០១៨នេះ ក្រុមហ៊ុននៅតែបន្តឈួសឆាយទៅលើដីរបស់ពួកគេដដែល ដោយមិនមានការជួយទប់ស្កាត់ណាមួយ ពីសំណាក់អាជ្ញាធរ ឲ្យមានប្រសិទ្ធភាពនោះទេ។
តំណាងប្រជាពលរដ្ឋបានលើកឡើងបន្ថែមថា ដីរបស់គាត់មិនបានលក់ឲ្យក្រុមហ៊ុនទេ តែក្រុមហ៊ុនបានដាក់គ្រឿងចក្រជីកលើកទំនប់ហ៊ុំព័ទ្ធរំលោភយកដីពួកគាត់តែម្តង ។ នៅពេលដែលក្រុមហ៊ុនបានដាក់គ្រឿងចក្រភ្លាម ពួកគាត់ក៏បានធ្វើការតវ៉ាជាបន្តបន្ទាប់ ។ នៅថ្ងៃទី ១២ ខែ ឧសភា ឆ្នាំ ២០១៨ ចាប់ផ្តើមធ្វើការតវ៉ាដំបូង ក៏មានអាជ្ញាធរស្រុកចុះមកធ្វើការសម្របសម្រួលរហូតមានការយល់ព្រមរវាងប្រជាពលរដ្ឋ និងក្រុមហ៊ុន ដោយភាគីខាងក្រុមហ៊ុនបានសន្យាថា ការដាក់គ្រឿងចក្រនេះ គឺគ្រាន់តែកម្ទេចព្រៃមើលព្រំដី ។ ប៉ុន្តែក្រុមហ៊ុនបែជាក្បត់ពាក្យសន្យា ដោយបានបញ្ជាគ្រឿងចក្រជីកកាយទំនប់វាទព្រំរំលោភចូលដីពួកគាត់ជារៀងរាល់ថ្ងៃ ជាពិសេសនៅពេលយប់ ក្រុមហ៊ុនបានលួចកាយផ្លូវផ្តាច់ទាំងអស់ ។
ប្រជាពលរដ្ឋក៏បានទទូចស្នើសុំសម្តេចតេជោ ហ៊ុន សែន ជួយអន្តរគមន៍ដោះស្រាយធ្វើយ៉ាងណាឲ្យខាងក្រុមហ៊ុនកាយលុបប្រឡាយវិញ ពីព្រោះខាងក្រុមហ៊ុនបានកាយផ្តាច់ផ្លូវ ចូលទៅដីរបស់ពួកគាត់ ដែលមិនអាចធ្វើដំណើរចូលទៅអាស្រ័យផលលើដីធ្លីបានឡើយ ។ តំណាងប្រជាពលរដ្ឋបញ្ជាក់ថា ដីដែលក្រុមហ៊ុនផានអ៊ីម៉ិច បំពានយកនេះ ជាដីបង្កបង្កើនស្រូវប្រាំង និងដាំកក់ ដែលពួកគេបានអាស្រ័យផលតាំងពីដើមរៀងមក មានចំនួន៥៤ហិកតា ស្ថិតក្នុងភូមិសំរោងក្អែរ ឃុំសំរោងធំ និងភូមិពោធិ៍មៀវ ឃុំគគីរធំ ស្រុកកៀនស្វាយ ខេត្តកណ្ដាល ដែលមានប្រជាពលរដ្ឋជាង២០០គ្រួសារ បានអាស្រ័យផល។
ទាក់ទិននឹងបញ្ហាខាងលើ លោក ទេព ឈួន មេឃុំសំរោងធំ បានឲ្យដឹងថា ដីនោះពិតជាដីអាស្រ័យផលរបស់ប្រជាពលរដ្ឋប្រាកដមែន ហើយកន្លងមកដីមួយផ្នែក ប្រជាពលរដ្ឋបានលក់ឲ្យទៅក្រុមហ៊ុន នៅសល់ប្រជាពលរដ្ឋច្រើនទៀត មិនបានទាន់លក់ទេ។ ឯបញ្ហាដែលក្រុមហ៊ុនទន្ទ្រាននោះ កន្លងមកលោក សុខ ពិសិដ្ឋ អភិបាលរងស្រុកកៀនស្វាយ ក៏បានចុះដោះស្រាយម្តងជាពីរដងរួចហើយដែរ តែប្រជាពលរដ្ឋនៅតែអះអាងថា ពួកគាត់មិនលក់ដីទៅឱ្យក្រុមហ៊ុននោះឡើយ ហើយការសម្របសម្រួលមិនបានបញ្ចប់បណ្តាលឱ្យរឿងនេះចេះតែមានបញ្ហារហូតមក ៕ ដោយ៖បញ្ញាស័ក្តិ