ស្ត្រីម្នាក់នៅក្នុងរដ្ឋ Texas (អាមេរិក) បានអះអាងនៅដើមសប្តាហ៍នេះ ដោយធ្វើការចោទប្រកាន់មន្ត្រីប៉ូលីសម្នាក់ រំលោភនាង ក្នុងអំឡុងពេលចាប់ខ្លួន ប៉ុន្តែ រូបភាពកាមេរ៉ាមួយដែលបានចេញផ្សាយថ្មីៗនេះ បានបញ្ចេញថា ការអះអាងរបស់នាង គឺជាទង្វើភូតកុហក និងជំរុញឲ្យមេធាវីជាន់ខ្ពស់របស់នាង ត្រូវធ្វើការសុំទោសជាសាធារណៈ ។
នាយកដ្ឋានសុវត្ថិភាពសាធារណៈរដ្ឋតិចសាស់ បាននិយាយក្នុងសេក្តីថ្លែងការណ៍ថា នៅវេលាម៉ោង ១ និង ៣០ នាទី ព្រឹកថ្ងៃអាទិត្យ មន្ត្រីល្បាតម្នាក់ឈ្មោះ Daniel Hubbard បានឃើញរថយន្ត Chevrolet Malibu ស៊េរីឆ្នាំ២០១៣ ធ្វើដំណើរនៅក្នុងស្រុក Ellis និងកំពុងបំពានច្បាប់ចរាចរណ៍ ។
ក្នុងអំឡុងឈប់ភ្លើងចរាចរណ៍ លោក Hubbard ក៏បានទៅធ្វើការឃាត់ខ្លួនស្ត្រីអ្នកបើកបរឈ្មោះ Sherita Dixon-Cole មកពី Grapevine បន្ទាប់ពីចោទប្រកាន់បើកបរស្ថិតក្នុងស្ថានភាពស្រវឹង និងនាំយកនាងទៅឃុំខ្លួននៅពន្ធនាគារស្រុក Ellis ។
ទោះយ៉ាងណា ស្ត្រីវ័យ ៣៧ ឆ្នាំ រូបនេះ បានអះអាងថា ខណៈកំពុងអង្គុយនៅកៅអីក្រោយ ប៉ូលីសនោះបានលូកដៃចូលក្នុងសំពត់របស់នាង និងចាប់នាង ។
លើសពីនេះ នាងបាននិយាយថា មន្ត្រីនោះបានគំរាមកំហែងបាញ់មិត្តប្រុសរបស់នាង ប្រសិននាងបានប្រាប់មិត្តប្រុសថា គាត់បំពានផ្លូវភេទនាង នៅពេលគាត់មកដល់កន្លែងកើតហេតុ ។
ការអះអាងរបស់នាង បានបង្កឲ្យមានប្រតិកម្មយ៉ាងខ្លាំង មិនគ្រាន់តែប្រឆាំងនឹងមន្ត្រីប៉ូលីសរូបនេះទេ ប៉ុន្តែ បានក៏បានធ្វើឲ្យប៉ះពាល់ដល់កិត្តិយសមន្ត្រីអនុវត្តច្បាប់ដទៃទៀតផងដែរ ដែលពុំមានចេតនាធ្វើបែបនេះ ។
ប៉ូលីសបានចេញផ្សាយវីដេអូដែលមានរយៈពេលជិត ២ ម៉ោង ដែលផ្ទុយពីការអះអាងរបស់នាង ។ វាបានបង្ហាញថា មន្ត្រីរងការចោទប្រកាន់ គឺធ្វើការតាមជំនាញវិជ្ជាជីវៈរបស់គាត់ប៉ុណ្ណោះ ។
បន្ទាប់ពីបានឃើញវីដេអូ មេធាវីរបស់ Dixon-Cole លោក Lee Merritt បានធ្វើការសុំទោសចំពោះមន្ត្រីប៉ូលីសរូបនេះ ចំពោះការធ្វើឲ្យខូចកិត្តិយសរបស់គាត់ ដោយសារតែទង្វើអះអាងក្លែងក្លាយរបស់កូនក្តីរបស់គាត់ ៕ ឧត្តម