បើតាមប្រភពព័ត៌មាន Xuehua បានចុះផ្សាយឲ្យដឹងថា ស្ត្រី២នាក់បានកើតមានជម្លោះខ្លាំងក្លាមួយ ជាមួយអ្នកបើកបររថយន្ត SUV ម្នាក់ ដោយពុំដឹងថាជាជម្លោះរឿងអ្វីនោះទេ ។ ប៉ុន្តែ នៅពេលពួកនាងដើរចេញ ស្រាប់តែបុរសនោះ បើករថយន្តរបស់ខ្លួនកៀរពួកនាងផ្ទប់នឹងខឿនចិញ្ចើមផ្លូវតែម្តង ។
វីដេអូពីកាមេរ៉ាសន្តិសុខ បានបង្ហាញឲ្យឃើញស្ត្រី២នាក់ បានដើរនៅលើចិញ្ចើមផ្លូវក្នុងទីក្រុង Jiangsu ប្រទេសចិន ខណៈពេលនោះ ក៏ស្រាប់តែរថយន្តតូច១គ្រឿងម៉ាក SUV បើកកៀរស្ត្រីម្នាក់ក្នុងចំណោមអ្នកទាំងពីរគួរឲ្យស្លុតរន្ធត់បំផុត ។
ភ្លាមៗនោះ ស្ត្រីរងគ្រោះម្នាក់ ក៏បានប្រតិកម្មផ្ទុះកំហឹងយ៉ាងខ្លាំង និងស្រវ៉ាចាប់ដុំថ្ម គប់យ៉ាងសន្ទាប់ទៅលើកញ្ចក់មុខរថយន្ត SUV នោះវិញ ។ ស្ថិតក្នុងសភាពបែបនេះ អ្នកបើកបរដែលក៏បញ្ចេញកំហឹង បានបើករថយន្តបំបុកស្ត្រីនោះ និងបើកអូសនាងជាច្រើនម៉ែត្រយ៉ាងសាហាវ ។
អ្នកដំណើរជាច្រើន ត្រូវបានឃើញនាំគ្នាប្រញាប់ប្រញាល់រត់សំដៅរថយន្តនោះ និងព្យាយាមលើវា ដើម្បីរំដោះស្ត្រីរងគ្រោះ ។
នៅទីបំផុត ស្ត្រីនោះត្រូវបានគេទាញចេញពីក្រោមរថយន្ត និងបញ្ជូនទៅសង្គ្រោះនៅមន្ទីរពេទ្យភ្លាមៗផងដែរ ។ ស្ត្រីនោះត្រូវបានគេរំពឹងថានឹងនៅមានជីវិត ៕ ឧត្តម