ពោធិ៍សាត់ ៖ មនុស្សមួយក្រុម ផឹកស៊ីស្រវឹងរៀងខ្លួន ក៏មានបុរស២នាក់ទាស់ពាក្យសម្តីគ្នា ហើយបុរសម្នាក់ បានយកដំបងឈើ គប់ទៅលើគូទំនាស់ ប៉ុន្តែមិនត្រូវ បែរជាដំបងហោះទៅត្រូវចំស្ត្រីម្នាក់ បណ្តាលឲ្យស្លាប់។
ជនរងគ្រោះឈ្មោះ ហ៊ិន អែម ភេទស្រី អាយុ៦០ឆ្នាំ ។ ជនសង្ស័យឈ្មោះ សឿម ស៊ីម រស់នៅភូមិ.ឃុំជាមួយជនរងគ្រោះ បានរត់គេចខ្លួន ដែលជាគូទំនាស់ ជាមួយនឹងប្តីស្ត្រីរងគ្រោះ ។ ករណីនេះកើតឡើងនៅចំណុចផ្ទះជនរងគ្រោះ ស្ថិតក្នុងភូមិអូរស្រាវ ឃុំព្រងិល ស្រុកភ្នំក្រវាញ ខេត្តពោធិ៍សាត់ កាលពីវេលាម៉ោង៨និង៣០នាទីយប់ ថ្ងៃទី២៨ ខែឧសភា ឆ្នាំ២០១៨ ។
សមត្ថកិច្ចមូលដ្ឋាន បានប្រាប់ឲ្យដឹងថា មុនពេលកើតហេតុ ស្ត្រីរងគ្រោះនិងប្តី បានហៅពឹងពររកអ្នកជិតខាង មកជួយលើកផ្ទះរបស់គាត់ ក្រោយលើកផ្ទះរួច ក៏មានការផឹកស៊ី លុះផឹកស្រវឹងរៀងខ្លួន ក៏មានទាស់ពាក្យសម្តីគ្នា។ ឈ្មោះ សឿម ស៊ីម ក៏បានយកដំបងបម្រុងគប់ជាម្ចាស់ផ្ទះ តែគប់មិនត្រូវ បែរជាចំស្រី្តជាប្រពន្ធ បណ្តាលឲ្យជនរងគ្រោះស្លាប់ ។
លោកវរសេនីយ៍ត្រី តាន់ គារិទ្ធ អធិការស្តីទី នៃអធិការដ្ឋាននគរបាលស្រុកភ្នំក្រវាញ បានបញ្ជាក់ឲ្យដឹងថា ក្រោយពេលកើតហេតុ សមត្ថកិច្ចបានពិនិត្យ និងធ្វើកោសល្យវិច័យ លើសាកសពជនរងគ្រោះ កសាងសំណុំរឿង តាមនីតិវិធីច្បាប់៕ ដោយ៖បញ្ញាស័ក្តិ