ភ្នំពេញ៖ សមត្ថកិច្ចព្រហ្មទណ្ឌ នៃស្នងការដ្ឋាននគរបាលរាជធានីភ្នំពេញ បានបញ្ជូននគរបាលខណ្ឌព្រែកព្នៅម្នាក់ ទៅកាន់សាលាដំបូងរាជធានីភ្នំពេញ ដោយសាររឿងបាញ់បោះសេរីចំនួន២គ្រាប់ នៅព្រឹកថ្ងៃទី២៩ ខែឧសភា ឆ្នាំ២០១៨នេះ។
លោក ប៊ុន សត្យា ប្រធានការិយាល័យនគរបាល ព្រហ្មទណ្ឌកម្រិតស្រាល បានបញ្ជាកថា ជនសង្ស័យមានឈ្មោះ ផន សុផល ភេទប្រុស អាយុ៣៣ឆ្នាំ ជានគរបាលខណ្ឌព្រែកព្នៅ ស្នាក់នៅផ្ទះលេខ ១៤៤ AE1 ផ្លូវ៥៩៨ ភូមិទួលគោក សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ។ ការចាប់ខ្លួនជនដៃដល់បាញ់បោះសេរីនេះកាលពីថ្ងៃទី២៧ ខែឧសភា ឆ្នាំ២០១៨ ក្រោយពេលសមត្ថកិច្ច ទទួលបានពាក្យបណ្តឹងរបស់ជនរងគ្រោះឈ្មោះ អន សារី ភេទប្រុស អាយុ៣០ឆ្នាំ ជាសន្តិសុខផ្សារផ្លាហ្សា។ យោងតាមពាក្យបណ្តឹងរបស់ជនរងគ្រោះ បានរៀបរាប់ថា នៅល្ងាចថ្ងៃទី២៦ ខែឧសភា ឆ្នាំ២០១៨ ជនសង្ស័យឈ្មោះ ផន សុផល បានជិះម៉ូតូ ម៉ាក ZOOMER X ពណ៌លឿង ក្នុងស្ថានភាពស្រវឹង បានដកកាំភ្លើងម៉ាក K54 បាញ់ឡើងលើ២គ្រាប់ ហើយផ្ទុះមួយគ្រាប់ នៅចំណុចមុខតូបលេខ ៧១៩០ ក្នុងផ្សារផ្លាហ្សា ផ្លូវលេខ៤៥ ភូមិទី១៧ សង្កាត់ស្រះចក ខណ្ឌដូនពេញ រាជធានីភ្នំពេញ៕ ដោយ៖បញ្ញាស័ក្តិ