តាកែវ៖ ថ្លែងក្នុងពិធីប្រកាសផ្ទេរភារកិច្ច តែងតាំងមុខតំណែង បំពាក់ឋានន្ដរស័ក្ដិ ជូនដល់នគរបាល៤៦រូប នៃស្នងការដ្ឋាននគរបាលខេត្តតាកែវអគ្គស្នងការរង នាយឧត្តមសេនីយ៍ ប៉ែន វិបុល បានណែនាំដល់កម្លាំងនគរបាលទាំងអស់ ត្រូវខិតខំប្រឹងប្រែងបំពេញការងារ យកចិត្តទុកដាក់ ដើម្បីការពារសន្ដិសុខ សណ្ដាប់ធ្នាប់ជូនប្រជាពលរដ្ឋឲ្យកាន់តែល្អប្រសើរ ជាពិសេសកម្លាំងនគរបាលក្នុងមូលដ្ឋានខេត្តតាកែវ ត្រូវតែក្ដោបក្ដាប់សភាពការណ៍ក្នុងមូលដ្ឋានរបស់ខ្លួន ហើយប្រសិនមានសភាពការណ៍ ឬចលនាញុះញង់ណាមួយកើតឡើង ត្រូវតែរាយការណ៍ជូនថ្នាក់លើជាបន្ទាន់ផងដែរ ដើម្បីមានវិធានការណ៍។
បន្ថែមពីនេះឯកឧត្តមអគ្គស្នងការរង ក៏បានប្រាប់ទៅកាន់មន្ដ្រីនគរបាលដែលទើបតែទទួលបានភារកិច្ចថ្មី មុខតំណែងថ្មី ត្រូវប្រឹងប្រែងបំពេញកិច្ចការងារទៅតាមភារកិច្ចរបស់ខ្លួន មិនត្រូវយកអំណាចទៅគៀបសង្កត់ប្រជាពលរដ្ឋណាម្នាក់នោះទេ ព្រោះស័ក្ត និងមេដាយកិត្តិយសទាំងអស់នោះគឺបានមកពីស្នារដៃនៃការបម្រើរាស្ត្រ ។
សូមបញ្ជាក់ផងដែរថាពិធីប្រកាសផ្ទេរភារកិច្ច តែងតាំងមុខតំណែង បំពាក់ឋានន្ដរស័ក្ដិ ជូនដល់នគរបាល៤៦រូប នៃស្នងការដ្ឋាននគរបាលខេត្តតាកែវ នោះគឺបានធ្វើឡើងក្រោមអធិបតីភាពឯកឧត្តមនាយឧត្តមសេនីយ៍ ប៉ែន វិបុល អគ្គស្នងការរងនគរបាលជាតិ និងជាប្រធាននាយកដ្ឋានបុគ្គលិក និងលោក ខាន់ សុខា អភិបាលរងខេត្តតាកែវ កាលពីថ្ងៃទី២៩ ខែឧសភា ឆ្នាំ២០១៨ នៅសាលប្រជុំនៃស្នងការដ្ឋាននគរបាលខេត្តតាកែវ ដែលនៅក្នុងពិធីនោះដែរ ក៏មានការផ្ដល់នូវគ្រឿងឥស្សរិយយស និងប្រគល់ប័ណ្ឌសរសើរ លិខិតសរសើរផងដែរ ក្នុងនោះមេដាយ៦៦គ្រឿង មានមាស៣០គ្រឿង, ប្រាក់២៣គ្រឿង, សំរិទ្ធ១៣គ្រឿង ៕ តាកែវ
