ខេត្តរតនគិរី ៖ ប្រជាពលរដ្ឋរស់នៅខេត្តរតនគីរី បង្ហាញការព្រួយបារម្ភខ្លាច ព្រៃឈើ នៅក្នុងបរិវេណឧទ្យានជាតិអូរយ៉ាវដាវ មានទីតាំងនៅស្រុកអូរយ៉ាវដាវ នឹងត្រូវរលាយហិនហោច ក្នុងពេលឆាប់ៗខាងមុខនេះ ខណៈរាល់ថ្ងៃនេះ ពលរដ្ឋចោទថា មានក្រុមឈ្មួញឈើ មានតួនាទីជាមន្ត្រីនគរបាល បានឃុបឃិតជាមួយមន្ត្រីបរិស្ថាន ដែលគ្រប់គ្រងនៅតំបន់ឧទ្យានជាតិនោះជាអ្នកនៅពីក្រោយបទល្មើសកាប់ព្រៃឈើទាំងនោះ។
ប្រជាពលរដ្ឋ បានអះអាងប្រាប់អ្នកយកព័ត៌មានគេហទំព័រ cen.com.kh ប្រចាំខេត្តរតនគិរីថា ពួកគេបានឃើញរថយន្តឡង់គ្រីស័រ ដែលជាកម្មសិទ្ធិ របស់មន្ត្រីនគរបាល ២គ្រឿង ព្រមទាំងឈើចំនួន ៦២កំណាត់ ជាប្រភេទឈើស្រឡៅ ត្រូវមន្ត្រីបរិស្ថាន សហការណ៍ជាមួយនគរបាលប៉ុស្តិ៍ឃុំយ៉ាទង់ បង្ក្រាបបាន ស្ថិតនៅក្នុងភូមិសំ ឃុំយ៉ាទង់ ស្រុកអូរយ៉ាដាវ ខេត្តរតនគិរី ត្រង់ចំណុចផ្លូវបំបែកចូលភូមិសំ កាលពីវេលា ៣ និង៤០នាទី រសៀលថ្ងៃទី២៧ ខែឧសភាឆ្នាំ២០១៨ កន្លងទៅនេះ។
បើតាមប្រភពពីសមត្ថកិច្ច និងអ្នកបើកបរឡានដឹកឈើល្មើសខាងលើ បានឲ្យដឹងថា រថយន្តឡង់គ្តីស័រ កែច្នៃព្រមទាំងឈើ ជាកម្មសិទ្ធិ របស់ឈ្មួញឈ្មោះ ឌឹម ជឿន ជានាយរងប៉ុស្តិ៍នគរបាល ឃុំប៉ក់ញៃ ព្រមទាំងមក្សពួកគេមួយចំនួនទៀត សរុបមានឡានដឹកឈើល្មើសច្បាប់ចំនួន ៣គ្រឿងដល់ពេលបង្ក្រាបមកធ្វើយឺតៗ ឡាន ១គ្រឿងទម្លាក់ឈើចោល ដូចប្រលែងទៅបាត់។
ប្រភពដដែល បានឲ្យដឹងថា ក្នុងសកម្មភាពល្មើសនោះ គឺពួកគេចូលកាប់ឈើ ដោយប្រើកម្លាំងប្រជាពលរដ្ឋជនជាតិដើមភាគតិច នៅក្នុងឃុំយ៉ាទង់ ជាអ្នកចូលកាប់។
ទាក់ទិនបញ្ហានេះ លោក លឿង ខេមរៈ ប្រធានស្នាក់ការឧទ្យានជាតិអូរយ៉ាដាវ បានឲ្យដឹងតាមទូរស័ព្ទ នៅរសៀលថ្ងៃទី២៩ ខែឧសភា ឆ្នាំ២០១៨ នេះថា លោកមិនហ៊ានបញ្ជាក់ពីឈ្មោះមេឈ្មួញឈើទាំងនោះថាជាអ្នកណាទេ។ ប៉ុន្តែភស្តុតាងរថយន្ត និងឈើ លោកកំពុងឲ្យកម្លាំងប្រមូលដឹកយកមករក្សាទុកនៅស្នាក់ការឧទ្យានជាតិអូរយ៉ាដាវ ដែលមានទីតាំងស្ថិតក្នុងភូមិព្រៃមាស ឃុំបរខាំ ស្រុកអូរយ៉ាដាវ នៅថ្ងៃទី២៩ នេះហើយ។ យ៉ាងនេះក្តី រហូតមកដល់ម៉ោង ២០និង២០នាទី ទៅហើយអាជ្ញាធរមិនទាន់បាននាំឈើល្មើសដែលចាប់បាននោះនៅឡើយទេ ដោយលោកលើកឡើងថា ជួលឡានគេអូសមិនបាន។
ទោះជាយ៉ាងណា ប្រជាពលរដ្ឋរស់នៅខេត្តរតនគិរី បានអះអាងថា រាល់ថ្ងៃនេះ ព្រៃឈើនៅក្នុងបរិវេណឧទ្យានជាតិជាតិ ដែលនៅសេសសល់ព្រៃឈើមួយចំនួន កំពុងរងនូវការបំផ្លាញ ស្ទើរជិតអស់ទៅហើយ ក្រោមស្នាដៃ លោកនាយរងប៉ុស្តិ៍ឈ្មោះ ឌឹម ជៀន ជាមេឈ្មួញឈើដុះស្លែ ក្រោមការឃុបឃិតជាប្រព័ន្ធ ជាមួយសមត្ថកិច្ចនៅតំបន់នោះ ដោយយកដៃប្រជាពលរដ្ឋជនជាតិដើមភាគតិចនៅតំបន់នោះ ជាអ្នកកាប់បំផ្លាញ។
ពលរដ្ឋឲ្យដឹងថា សកម្មភាពកាប់បំផ្លាញ និងដឹកជញ្ជូនព្រៃឈើខុសច្បាប់នៅក្នុឧទ្យានជាតិខាងលើនេះ មិនមែនទើបតែធ្វើសកម្មភាពនោះទេ គឺគេដឹកយកទៅលក់ប្រទេសវៀតណាម តាមច្រករបៀងភ្នំក្រហម និងច្រកភូមិឡំទាំងយប់ ទាំងថ្ងៃ ទាំងរដូវប្រាំង និងរដូវវស្សាជាច្រើនឆ្នាំមកហើយ។ ប៉ុន្តែពលរដ្ឋមានសម្ងល់ថា ហេតុអ្វីបសនជាមន្ត្រីបរិស្ថាន និងអាជ្ញាធរមូលដ្ឋាន ដែលឈរជើងប្រចាំការនៅតំបន់នោះ មិនអាចនិយាយថាមិនដឹងអំពើបទល្មើសព្រៃឈើទាំងនោះៗបានទេ..?។
ប្រជាពលរដ្ឋ អះអាងថា សូម្បីតែព្រៃឈើនៅតំបន់ប្រាសាទតាក់ណាំង ក៏រលាយហិនហោចដើមឈើធំៗអស់ស្ទើរទាំងស្រុងហើយដែរ។
ទាក់ទងសកម្មភាពខាងលើនេះដែរ អ្នកយកព័ត៌មានគេហទំព័រ cen.com.kh ប្រចាំខេត្តរតនគិរី មិនទាន់អាចស្នើការបំភ្លឺជុំវិញការចោទប្រកាន់ខាងលើពី លោក ឌឹម ជៀន បានទេតាមទូរស័ព្ទ នៅរសៀលថ្ងៃទី២៩ ខែឧសភា ឆ្នាំ២០១៨៕ ដោយ៖ PSR
