យុវជនម្នាក់បាននិយាយលេងថា មានគ្រាប់បែកនៅលើយន្តហោះដែលកំពុងត្រៀមដំណើរហោះហើរ ជាហេតុធ្វើឲ្យអ្នកនៅក្នុងយន្តហោះភ័យតក់ស្លុត នាំគ្នាលោតចេញពីយន្តហោះ ហើយរងរបួស ។ អ្នកដំណើរប្រមាណ 189 នាក់ ដែលកំពុងស្ថិតនៅលើយន្តហោះត្រៀមហោះហើរចេញពី Borneo ឆ្ពោះទៅកាន់ Jakarta នៅយប់ថ្ងៃទី ១៨ ខែឧសភា បានឮសូរបុរសម្នាក់និយាយទៅកាន់អ្នកបម្រើថា មានគ្រាប់បែកមួយគ្រាប់នៅលើយន្តហោះ Lion Air Boeing 737 ។ អ្នកដំណើរជាច្រើនភ័យស្លន់ស្លោរបាននាំគ្នាបើកទ្វារសង្គ្រោះបន្ទាន់ឈរលើស្លាបយន្តហោះ រួចលោតចុះមកដីក្នុងរយៈកម្ពស់ប្រមាណ ៣ ម៉ែត្រ ។
អ្នកនាំពាក្យរបស់ប៉ូលិសម្នាក់នៅ Kalimantan ភាគខាងលិចបាននិយាយថា មានអ្នកដំណើរ ៨នាក់ ត្រូវដឹកទៅសង្គ្រោះព្រោះបាក់ឆ្អឹងនិងបែកក្បាល ។ នៅមានអ្នកដំណើរ២នាក់ផ្សេងទៀតរងរបួសស្រាលផងដែរ -នេះបើតាម RT ។ អ្នករពិសមាត់ថាមានគ្រាប់បែក ឈ្មោះ Fran អាយុ ២៦ឆ្នាំ ត្រូវបានចាប់ខ្លួន រួមនឹងអ្នកដំណើរដែលបានបើកទ្វារសង្គ្រោះបន្ទាន់របស់យន្តហោះ ។ បន្ទាប់មកសមត្ថកិច្ចនៅព្រលានយន្តហោះ បានធ្វើការត្រួតពិនិត្យ តែពុំបានរកឃើញរំសេវផ្ទុះអ្វីឡើយ ។ ៣ ម៉ោងក្រោយមកយន្តហោះក៏បានចេញដំណើរ ៕ សូយន