ភ្នំពេញ៖ សមត្ថកិច្ចនគរបាលខណ្ឌពោធិ៍សែនជ័យ សម្រេចបញ្ជូនថៅកែហាងលក់សម្លៀកបំពាក់ ធ្វើទារុណកម្មលើកូនឈ្នួលអាយុ១៦ ឆ្នាំ ដែលមានរយៈពេល៤ឆ្នាំមកនោះ ទៅតុលាការក្រោមបទចោទករណីអំពើហិង្សាដោយចេតនា។
នៅព្រឹកថ្ងៃទី ២៩ ខែ ឧសភានេះ អាជ្ញាធរខណ្ឌពោធិ៍សែនជ័យសម្រេចបញ្ជូនសំណុំរៀងថៅកែហាងលក់សម្លៀកបំពាក់ធ្វើទារុណកម្មលើកូនឈ្នួលជាជំនួយការមេផ្ទះទៅសាលាដំបូងរាជធានីភ្នំពេញចាត់ការតាមច្បាប់។ ជនសង្ស័យឈ្មោះ ម៉េង រ័ត្នពិសី អាយុ ៣៣ ឆ្នាំ ជាម្ចាស់ហាងលក់សម្លៀកបំពាក់នៅសង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ។ ក្មេងស្រីរងគ្រោះអាយុ ១៦ ឆ្នាំឈ្មោះ ជា ស្រីនូ ហៅ ស្រីពៅ មានស្រុកកំណើតភូមិទំនប់ថ្មី ស្រុកអន្លង់វែង ខេត្តឧត្តរមានជ័យ បានចាប់ផ្តើមធ្វើជាអ្នកបម្រើនៅផ្ទះជន សង្ស័យរ័ត្នពិសីចាប់តាំងពីមានអាយុ ១២ ឆ្នាំ។ ចាប់ពីពេលនោះហើយ ក្មេងស្រីរងគ្រោះត្រូវបានរងការប្រើអំពើហិង្សាយ៉ាងធ្ងន់ធ្ងរក្នុងរយៈពេល៤ឆ្នាំ។
លោក ជា សុវណ្ណ អធិការរងនគរបាលខណ្ឌ បានបញ្ជាក់ថា ជនសង្ស័យឈ្មោះ រ័ត្នពិសី បានប្រើអំពើហិង្សាលើក្មេងស្រីជាកូនឈ្នួលតាំងពីមានអាយុ ១២ ឆ្នាំ ពោលគឺ រយៈពេល ៤ ឆ្នាំមកគិតមកដល់ពេលនេះ។ អាជ្ញាធរមានសមត្ថកិច្ចបានបញ្ជូនជនសង្ស័យទៅសា លាដំបូងរាជធានីភ្នំពេញដោយចោទប្រកាន់ពីបទប្រើអំពើហិង្សាដោយចេតនាលើក្មេងស្រីអនីតិជន។
ក្មេងស្រីរងគ្រោះ អះអាងថា ថៅកែស្រីបានយកដែកហាលខោអាវវាយកដំជាំពេញរាងកាយស្ទើររាល់ថ្ងៃក្នុងរយៈពេល ៤ ឆ្នាំកន្លង មកនេះ។ ស្រីនូថា ពេលខ្លះម្ចាស់ផ្ទះរូបនេះ បានយកម្ជុលដេរខោអាវចាក់ពោះ និងភ្លៅនាងថែមទៀតផង៕ ដោយ៖បញ្ញាស័ក្តិ
