ភ្នំពេញ ៖ កុមារីម្នាក់ មានអាយុទើបតែ៤ឆ្នាំ ពេលកំពុងងូតទឹកភ្លៀង ត្រូវបានបុរសជនជាតិវៀតណាមចិត្តព្រៃផ្សៃម្នាក់ រស់នៅម្ដុំក្បែរផ្ទះគ្នា ចាប់រំលោភ ហើយសម្លាប់យកសពទៅទម្លាក់ក្នុងពាងទឹកនៅលើផ្ទះ កាលពីយប់ថ្ងៃទី២៩ ឧសភា ស្ថិតតាមបណ្តោយផ្លូវជាតិលេខ៥ ត្រង់ចំណុចម្តុំគីឡូលេខ៧ (ផ្ទះឈើមាត់ច្រាំងទន្លេ) ក្នុងភូមិកសង្កាត់ច្រាំងចំរេះ២ ខណ្ឌប្ញស្សីកែវ ប៉ុន្តែជនសង្ស័យត្រូវឃាត់ខ្លួនបានផងដែរ ។
ក្មេងស្រីរងគ្រោះអាយុ៤ឆ្នាំ មានឪពុកឈ្មោះខា ហូល អាយុ៣២ឆ្នាំ និងម្តាយឈ្មោះចាន់ ធីជី អាយុ២៦ឆ្នាំ ស្នាក់នៅភូមិក សង្កាត់ច្រាំងចំរះ២ ខណ្ឌឫស្សីកែវ ។ ចំណែកជនសង្ស័យឈ្មោះង្វៀង យ៉ាំង យី អាយុ៣៣ឆ្នាំ ជនជាតិវៀតណាម មានទីលំនៅផ្ទះគ្មានលេខ ក្រុម៥ ភូមិក សង្កាត់ច្រាំងចំរេះ២ ខណ្ឌឫស្សីកែវ មានមុខរបរលក់ដំឡូង ស្នាក់នៅទីតាំងកើតហេតុខាងលើ។
ប្រភពឱ្យដឹងថា ឪពុកម្តាយក្មេងស្រីរងគ្រោះបាននិយាយថា គាត់មានកូន៤នាក់ (ស្រី៣ និងងកូនប្រុស១) កូនស្រីដែលស្លាប់ជាកូនស្រីទី២ មានអាយុ៤ឆ្នាំ នៅរៀនសាលាមត្តេយ្យ ។ នៅមុនពេលកើតហេតុម៉ោងជិត៦ព្រលប់ កូនស្រីបានចេញពីរៀន រួចក៏នាំគ្នាហូបបាយជុំគ្នារហូតដល់ម៉ោងជាង៦ល្ងាច មេឃក៏ភ្លៀង ។ កូនស្រីទី២គាត់ បានចេញទៅងូតទឹកភ្លៀងលេងនៅខាងក្រៅផ្ទះបាត់ រហូតដល់ម៉ោង៨យប់ ទើបឪពុកដើររកជុំវិញភូមិ ឃើញកូនស្រីនៅក្នុងពាងទឹក។
ក្រោយកើតហេតុ សមត្ថកិច្ចខណ្ឌឫស្សីកែវបានធ្វើការស្រាវជ្រាវដឹងថា ជាករណីរំលោភ រហូតដល់ស្លាប់សមត្ថកិច្ចបានរុករកជនសង្ស័យ អស់រយៈពេលជិត៣ម៉ោង ទើបរកឃើញជនសង្ស័យដែលធ្វើសកម្មភាពរួចបានរត់ទៅសម្ងំក្នុងទន្លេដល់ពេលឡើងមកវិញ នៅផ្លូវជាតិលេខ៥ក្បែរផ្សារច្រាំងចំរេះ ក៏ត្រូវសមត្ថកិច្ចចាប់ខ្លួនតែម្តង៕ ដោយ៖បញ្ញាស័ក្តិ