គេហទំព័រ taiwannews បានចុះផ្សាយព័ត៌មានកាលពីថ្ងៃទី២៧ ខែឧសភា ឲ្យដឹងថា បុរសជនអង់គ្លេសម្នាក់ ត្រូវបានជនជាតិចិនមួយក្រុម លើកគ្នាវាយប្រហារយ៉ាងសាហាវ រហូតបាក់ឆ្មេញអស់១ ស្ថិតនៅក្នុងក្រុងព្រះសីហនុ ប្រទេសកម្ពុជា នៅពេលក្រុមជនជាតិចិនទាំងនោះ បានរកឃើញបុរសអង់គ្លេសនេះ មានចាក់សាក់នៅលើថ្ងាសជាមួយ «អក្សរតៃវ៉ាន់» ហើយគាត់បដិសេធទទួលស្គាល់ការអះអាងរបស់ពួកគេថា ប្រទេសតៃវ៉ាន់នេះជាផ្នែកមួយរបស់ចិន ។
ក្នុងអំឡុងនៃដំណើរទេសចរណ៍នៅក្នុងប្រទេសកម្ពុជា បុរសអង់គ្លេសដែលបានរស់នៅក្នុងតៃវ៉ាន់ អស់រយៈពេល ១៤ ឆ្នាំ មកហើយ និងក៏ត្រូវបានគេស្គាល់មានឈ្មោះថា Paul នោះនៅវេលាម៉ោង ១១ យប់ថ្ងៃអាទិត្យ (២៧ ឧសភា) គាត់បានចូលទៅអង្គុយនៅក្នុងបារមួយកន្លែង នៅក្នុងក្រុងព្រះសីហនុ ។ នៅពេលគាត់កូម្ម៉ង់ស្រាបៀរញ៉ាំ និងដោះមូកចេញ ស្រាប់តែជនជាតិចិន១ក្រុម ដែលអង្គុយក្បែរនោះ ដែលត្រូវបានជឿថាជាកម្មករចំណាកស្រុក បានកត់សម្គាល់ទៅលើសាក់ថ្ងាសរបស់ដែលមានមានអក្សរ «តៃវ៉ាន់» ។
ម្នាក់ក្នុងចំណោមជនជាតិចិនទាំងនោះ បន្ទាប់មកបានស្រែកក្នុងភាសាចិនកុកងឺថា «តៃវ៉ាន់ គឺជារបស់ចិន! » ។ ភ្លាមៗនោះ Paul ក៏បានតបទៅវិញថា «តៃវ៉ាន់ គឺតៃវ៉ាន់»។ បន្ទាប់ពី Paul បាននិយាយប៉ុណ្ណឹង ស្រាប់តែ ពួកជនជាតិចិនទាំងនោះ ស្ទុះមកវាយគាត់យ៉ាងសាហាវតែម្តង ។
Paul និយាយថា មានជនជាតិយ៉ាងតិច ១០ នាក់ បានព្រួតវាយគាត់ ដោយទាមទារឲ្យគាត់និយាយថា តៃវ៉ាន់គឺជាផ្នែកមួយរបស់ចិន ព្រោះមានអ្នកនៅក្បែររាប់រយនាក់ កំពុងសម្លឹងមើល ។ បើទោះជាគាត់ដិសេធនិយាយថា តៃវ៉ាន់ពុំមែនជារបស់ចិនក៏ដោយ តែដោយមានការភ័យខ្លាចសម្រាប់អាយុជីវិត Paul ក៏បាននិយាយជាភាសាចិនកុកងឺថា «យល់ព្រម អ្នកគិតថា តៃវ៉ាន់ គឺជារបស់ចិន ខ្ញុំក៏នឹងថា តៃវ៉ាន់គឺជារបស់ចិនដែរ និងបានចាកចេញ» ។
ទោះយ៉ាងណា Paul បានរងរបួសច្រើនកន្លែងនៅលើក្បាល, បាក់រលើងឆ្មេញអស់១ និងមានស្នាមជាំកន្លែងកន្លែងនៅលើដងខ្លួនរបស់គាត់ ។
Paul បានបង្ហោះនៅលើគណនីហ្វេសប៊ុករបស់ខ្លួន ដោយបានរៀបរាប់អំពីហេតុការណ៍ដ៏គួរឲ្យសោកស្តាយនេះ និងទទួលស្គាល់ការចាក់សាក់អក្សរតៃវ៉ាន់នៅលើថ្ងាសរបស់គាត់ និងព្រមានដល់អ្នកទេសចរដទៃ ឲ្យប្រុងប្រយ័ត្ន ខណៈធ្វើដំណើរនៅក្នុងប្រទេសកម្ពុជា ។
«នៅថ្ងៃខាងមុខ ខ្ញុំនឹងពុំដោះមូកចេញទេ និងត្រៀមលុបសាក់នេះចេញផងដែរ ព្រោះវាជាកំហុសឆ្គងឡប់ៗមួយក្នុងពេលផឹកស៊ីស្រវឹង ក្នុងការចាក់សាក់នៅលើផ្ទៃមុខ និងផ្នែកដទៃទៀតនៃដងខ្លួនរបស់ខ្ញុំ ។ ខ្ញុំសង្ឃឹមថា ខ្លួនប្រាណរបស់ខ្ញុំនឹងស្រស់ស្អាតឡើង បន្ទាប់ពីលុបសាក់ទាំងនេះចេញ» ។
លោកបន្តថា៖ «ជនជាតិតៃវ៉ាន់ ចូរប្រុងប្រយ័ត្នអំពីសុវត្ថិភាពរបស់ខ្លួននៅបរទេស! ជាការពិតណាស់ ខ្ញុំបានជួបជនជាតិចិនល្អៗច្រើន ស្ថិតនៅទីនេះក្នុងប្រទេសកម្ពុជា ប៉ុន្តែ ក្រុមនេះពិតជាសាហាវ ដែលចូលចិត្តបង្កបញ្ហាដល់អ្នកដទៃ» ៕ ឧត្តម