ស្ត្រីម្នាក់ថ្មីៗនេះ បានទទួលរងការឈឺចាប់ បន្ទាប់ពីត្រូវបានម្ជុល១ចាក់ ដែលហាក់ដូចធ្លាប់ត្រូវចាក់ថ្នាំអីចឹង ខណៈនាងកំពុងធ្វើដំណើរនៅលើរថភ្លើង (BART) កាលពីសប្តាហ៍មុន ។
យោងតាមប្រភពព័ត៌មាន បានឲ្យដឹងថា ស្ត្រីម្នាក់ឈ្មោះ Linda Quan បានជិះរថភ្លើងទៅកាន់ San Francisco រដ្ឋ California កាលពីព្រឹកថ្ងៃព្រហស្បតិ៍ ។ បន្ទាប់ពី ស្ថិតនៅលើរថភ្លើងរយៈពេល ៣០ នាទី នាងក៏ស្រាប់មានការភ្ញាក់ផ្អើលខ្លួនឯង នៅពេលមានអារម្មណ៍ថាមានអ្វីៗចាក់ដោតពីកៅអីរបស់នាង ។
នាងនិយាយថា៖ «នៅពេលមានអារម្មណ៍បែបនេះ ខ្ញុំក៏បានក្រោកឡើង និងសម្លឹងមើលនូវអ្វីដែលបង្កឲ្យខ្ញុំឈឺចាប់ ហើយពុំដឹងថានោះជារបស់អ្វីទេ ប៉ុន្តែ បានដឹងថា វាចុងស៊ឺរាំងមួយ» ។
ភាពស្លុតរន្ធត់ពុំទាន់បញ្ចប់នោះទេ ព្រោះនាងនៅបានរកឃើញថាវាពិតជាម្ជុលមួយ ដែលឃើញនៅខាងក្រោមកៅអី និងសូម្បីមានថ្នាំញៀនបន្ថែមទៀត ។
នាងបាននិយាយ និងឆ្ងល់ថាហេតុអ្វីបានជា BART អត់ចេះពិនិត្យមើលអ្វីសោះអីចឹង ដើម្បីទប់ស្កាត់រឿងនេះកើតឡើង៖ «វាជាអាយុជីវិត និងសុវត្ថិភាពរបស់មនុស្ស ហើយករណីបែបនេះ វាអាចបង្កគ្រោះថ្នាក់ដល់ជីវិតរបស់ខ្ញុំ ប្រសិនខ្ញុំឆ្លងរោគ» ។
នាងបន្ថែមថា៖ «ខ្ញុំពិតជាព្រួយបារម្ភខ្លាំងណាស់ ។ ខ្ញុំបារម្ភពេញ១ថ្ងៃនេះ និងម្សិលមិញ ហើយខ្ញុំនឹងព្រួយបារម្ភសុខភាពរបស់ខ្ញុំបន្ត ក្នុងរយៈពេល ១៨ ខែទៀត» ។
នៅពេលនេះ ខាងក្រុមហ៊ុន BART បាននិយាយថា ពួកគេឥឡូវនេះ បានជួលបុគ្គលិកបន្ថែម ដូចជាប៉ូលីស និងអ្នកអនាម័យ ដើម្បីធ្វើឲ្យប្រព័ន្ធដឹកជញ្ជូនសាធារណៈមួយនេះ ប្រកបដោយសុវត្ថិភាព ៕ ឧត្តម
