ខេត្តព្រះសីហនុ៖ សម្ដេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា បានអញ្ជើញបើកការដ្ឋានសាងសង់អាគារពាណិជ្ជកម្ម និងសណ្ឋាគារ មានឈ្មោះថា «ស្កាយម៉ោងថិន វីយូរ» មានទីតាំងស្ថិតនៅសង្កាត់លេខ៣ ក្រុងព្រះសីហនុ កាលពីព្រឹកថ្ងៃពុធ ទី៣០ ខែឧសភា ឆ្នាំ២០១៨។
នាឱកាសនោះ សម្ដេច សាយ ឈុំ ប្រធានព្រឹទ្ធសភា មានប្រសាសន៍ថា គម្រោងសំណង់អាគារដ៏ធំស្កឹមស្កៃ ដែលនឹងបង្ហាញខ្លួននាមូលដ្ឋានខេត្តព្រះសីហនុនៅពេលខាងមុខនេះ គឺដោយសារតែប្រទេសកម្ពុជា មានសុខសន្តិភាពពេលញលេញ។ ជាងនេះ ក៏ដោយសារមានកិច្ចសហប្រតិបត្តិការសេដ្ឋកិច្ចផ្លូវសូត្រ រវាងកម្ពុជា-ចិន និងកិច្ចសហប្រតិបត្តិការមេគង្គឡាំឆាង ព្រមទាំងមានការផ្លាស់ប្តូរវប្បធម៌ សេដ្ឋកិច្ច ទេសចរណ៍ និងលំហូរអ្នកវិនិយោគ និងទេសចរណ៍ពីប្រទេសចិន ចូលមកកម្ពុជាជាបន្តបន្ទាប់មកនេះ។
ផ្តើមពីបញ្ហានេះ សម្ដេចវិបុលសេនាភក្តី សាយ ឈុំ បានចាត់ទុកថា ក្រុមហ៊ុន ស្កាយម៉ោងថិន វីយូរ គឺជាដៃគូអភិវឌ្ឍដ៏សំខាន់មួយ ក្នុងការរួមចំណែកដល់ការអភិវឌ្ឍន៍សេដ្ឋកិច្ចជាតិ តាមរយ:ការជួយទាក់ទាញទេសចរ និងពាណិជ្ជកម្មនានា ឲ្យចូលមកកម្ពុជា ក៏ដូចជាខេត្តព្រះសីហនុ ឲ្យបានច្រើនថែមទៀតនាថ្ងៃខាងមុខ។ ជាងនេះ ក៏នឹងជួយបង្កើនការងារដល់ប្រជាពលរដ្ឋកម្ពុជា ពិសេសយុវជន ឲ្យមានការងារធ្វើបង្កើនជីវភាពគ្រួសារ បានកាន់តែរីកចំរើនថែមទៀតនាថ្ងៃអនាគត។
នាឱកាសនោះដែរ សម្តេច សាយ ឈុំ ក៏បានណែនាំដល់ម្ចាស់ក្រុមហ៊ុន ត្រូវតែអនុវត្តការងារសាងសង់សំណង់ដ៏ធំស្កឹមស្កៃរបស់ខ្លួន ឲ្យស្របតាមតាមលក្ខណៈបច្ចេកទេសឲ្យបានត្រឹមត្រូវ និងសិក្សាពីផលប៉ះពាល់បរិស្ថានផ្សេងៗ នៅក្នុងអំឡុងពេលដំណើរការសាងសង់អគារពាណិជ្ជកម្ម និងសណ្ឋាគារខាងលើ ធ្វើយ៉ាងណាឲ្យស្របតាមច្បាប់ នៃព្រះរាជាណាចក្រកម្ពុជាបានកំណត់៕ ដែន សីមា
