ភ្នំពេញ ៖ គណៈបញ្ជាការឯកភាពរាជធានីភ្នំពេញ បានបើកកិច្ចប្រជុំមួយដើម្បីពង្រឹងសន្តិសុខ សុវត្ថិភាពជូនប្រជាពលរដ្ឋ ការពង្រឹងលើការរៀបចំសណ្តាប់ធ្នាប់សាធារណៈ នៅលើផ្លូវធំៗទាំង១១ខ្សែ បញ្ហាអគ្គិភ័យ ពិសេសគឺផ្តោតសំខាន់ លើកិច្ចការពារសន្តិសុខ សុវត្ថិភាព ក្នុងការបោះឆ្នោត ដែលនឹងប្រព្រឹត្តទៅនាពេលខាងនេះ។
កិច្ចប្រជុំនេះធ្វើឡើងនៅរសៀលថ្ងៃទី៣០ ឧសភា២០១៨នេះ ក្រោមអធិបតីភាពលោកឃួង ស្រេង ប្រធានគណៈបញ្ជាការឯកភាពរាជធានីភ្នំពេញ ដោយមានការចូលរួមពីអភិបាលរងរាជធានី លោករ័ត្ន ស្រ៊ាង មេបញ្ជាការកងរាជអាវុធហត្ថរាជធានីភ្នំពេញ លោកជួន សុវណ្ណ អគ្គស្នងការនគរបាលជាតិ និងជាស្នងការនគរបាលរាជធានីភ្នំពេញ អភិបាលខណ្ឌទាំង១២ ព្រមទាំងមន្ទីរចំណុះឲ្យរដ្ឋបាលរាជធានីភ្នំពេញទាំងអស់ផងដែរ។
លោកឃួង ស្រេង ប្រធានគណៈបញ្ជាការឯកភាពរាជធានីភ្នំពេញ បានមានប្រសាសន៍ថា ការបើកកិច្ចប្រជុំនេះឡើង គឺដើម្បីពង្រឹងបន្ថែមទៅលើបញ្ហា កិច្ចការពារសន្តិសុខ សុវត្ថិភាពជូនប្រជាពលរដ្ឋ នៅក្នុងរាជធានីភ្នំពេញឲ្យកាន់តែប្រសើរឡើង និងការផ្ទៀងផ្ទាត់ឡើងវិញ ជុំវិញលើការរៀបចំសណ្តាប់ធ្នាប់សាធារណៈនៅលើផ្លូវធំៗទាំង១១ខ្សែ ដែលរដ្ឋបាលរាជធានីភ្នំពេញបានដាក់ចេញជាផែនការជាអាទិភាពនាពេលកន្លងមកនេះ ។
ក្នុងអង្គប្រជុំនោះលោកជួន សុវណ្ណស្នងការរាជធានីភ្នំពេញ ក៏បានរាយការណ៍ពីផែនការ ក្នុងកិច្ចការពារសន្តិសុខ សុវត្តិភាព សណ្តាប់ធ្នាប់ ក្នុងការបោះឆ្នោតជ្រើសរើសតំណាងរាស្ត្រនីតិកាលទី៦ នៅក្នុងរាជធានីភ្នំពេញ។ ក្រៅពីនេះ លោកអភិបាលខណ្ឌទាំង១២ក៏បានលើកឡើងពីសភាពការណ៍ចោរ លួច ឆក់ ប្លន់ ល្បែងស៊ីសងនៅក្នុងមូលដ្ឋានរបស់ខ្លូននីមួយៗផងដែរ ដើម្បីរិះរកគ្រប់មធ្យោបាយធ្វើយ៉ាងណាឲ្យភូមិសង្កាត់មានសុវត្ថិភាព បង្កើតឲ្យបានភាពកក់ក្តៅជូនប្រជាពលរដ្ឋ។
លោកម៉េត មាសភក្តី អ្នកនាំពាក្យសាលារាជធានីភ្នំពេញ បានថ្លែងប្រាប់អ្នកសារព័ត៌មាន បន្ទាប់ពីបញ្ចប់កិច្ចប្រជុំ នារសៀលថ្ងៃទី៣០ ខែឧសភា ឆ្នាំ២០១៨នេះថា លោកអភិបាលបានណែនាំដល់អាជ្ញាធរខណ្ឌទាំង១២ រួមនឹងជំនាញពាក់ព័ន្ធទាំងអស់ ត្រូវចុះរៀបចំសណ្តាប់ធ្នាក់ចាប់តាំងពីពេលនេះតទៅរហូតដល់ពេលបោះឆ្នោត។ លោកបានបន្តថា លោកអភិបាលរាជធានីភ្នំពេញ បានជំរុញដល់អាជ្ញាធរខណ្ឌ មន្ទីរ ពាក់ព័ន្ធត្រូវផ្សព្វផ្សាយដល់ប្រជាពលរដ្ឋ ឲ្យទៅចូលរួមបោះឆ្នោតឲ្យបានគ្រប់ៗគ្នា ដើម្បីបំពេញសិទ្ធិ ឬក៏ការប្រើប្រាស់សិទ្ធិ ក្នុងនាមជាប្រជាពលរដ្ឋខ្មែរមួយរូប ក្នុងការបោះឆ្នោត។
លោកអ្នកនាំពា្យ បានបញ្ជាក់ថា ក្នុងកិច្ចប្រជុំនោះក៏បានលើកឡើងអំពីផ្លូវ១១ខ្សែ ដែលក្នុងរយៈពេលប៉ុន្មានខែចុងក្រោយនេះ ដែលអាជ្ញាធររាជធានី បានប្រគល់សិទ្ធិរៀបចំដល់អាជ្ញាធរខណ្ឌជាអ្នកទទួលខុសត្រូវនោះ មានវឌ្ឍនភាពល្អប្រសើរផងដែរ លើកលែងតែទីតាំង មួយចំនួនពិបាកក្នុងការៀបចំ ដូចជានៅតាមផ្លូវ២៧១ ម្តុំមុខពេទ្យរុស្ស៊ី ផ្លូវសហព័ន្ធរុស្ស៊ី ខាងមុខក្រសួងការងារ និងនៅតាមបណ្តាទីតាំងអាជីវកម្មមួយចំនួនដែល ។ លោកបានបញ្ជាក់ថា ម្ចាស់អាជីវកម្មទាំងនោះបានចូលរួមជាមួយអាជ្ញាធរ ប៉ុន្តែនៅមានប្រជាពលរដ្ឋមួយចំនួនទៀត នៅតែមិនទាន់បានសហការបានល្អនៅឡើយ។ ការងារនេះថ្នាក់ដឹកនាំក៏បានពិគ្រោះ និងពិភាក្សាគ្នានៅក្នុងអង្គប្រជុំ ជំរុញឲ្យមានការយកចិត្តទុកដាក់លើការងារនេះបន្ថែមទៀត។
ជាពិសេសនៅលើទីតាំង ដែលមានការកកស្ទះខ្លាំងតែម្តង ដែលកើតឡើងចេញពីបញ្ហា សណ្តាប់ធ្នាប់តាមដងផ្លូវនេះ។ អង្គប្រជុំ បានពិភាក្សាបន្ថែមទៀត ទៅលើបញ្ហាចោរកម្ម លួច ឆក់ប្លន់ ល្បែងស៊ីសង និងបញ្ហាអគ្គិភ័យផងដែរ ដោយក្នុងនោះបញ្ហាចោរកម្ម លួចឆក់ប្លន់ ហាក់បីដូចជាមានការថមថយល្អប្រសើរជាងមុន ដោយសារតែទាំងសមត្ថកិច្ច និងរួមអាជ្ញាធរមូលដ្ឋាន រួមគ្នារឹតបន្តឹងការងារសន្តិសុខនេះបានល្អប្រសើរ ហើយនឹងបន្តការងារនេះ ដើម្បីផ្តល់នូវសន្តិសុខសុវត្ថិភាព ជូនដល់ប្រជាពលរដ្ឋបន្ថែមទៀត ។ ចំណែកបញ្ហាគ្រោះអគ្គិភ័យ ដែលគ្រោះកើតឡើងដោយចៃដន្យ ដោយគ្មានគ្រោងទុក ឬគ្មាននរណាម្នាក់ចង់ឲ្យកើតឡើងនោះទេដែលក្នុងមួយរយៈចុងក្រោយនេះមានបញ្ហាគ្រោះអគ្គិភ័យតូចៗកើតឡើងច្រើនផងដែរ ។ បញ្ហានេះលោកអភិបាល បានណែនាំដល់អាជ្ញាធរពាក់ព័ន្ធត្រូវពិភាក្សបន្ថែមទៀត ហើយមួយរយៈពេល ទទួលបានការសាទរពីសំណាក់ប្រជាពលរដ្ឋ ក្នុងការអន្តរាគមន៍ជួយសង្រ្គោះក្នុងគ្រោះអគ្គិភ័យ បានន័យថា អគ្គិភ័យកើតឡើង ប៉ុន្តែចំណាត់ការរបស់អាជ្ញាធរ មានប្រសិទ្ធភាពខ្ពស់ជាងមុន ដែលអាចលុបបំបាត់ចោល នូវពាក្យថានៅពេលដែលក្រុមអគ្គិភ័យ ទៅជួយសង្រ្គោះនោះ តែងតែមានបញ្ហាអីចេះបញ្ហាអីចុះ មុនពេលចាប់ផ្តើមបាញ់ពន្លត់ភ្លើង អីចឹងទេ រូបភាពទាំងអស់នោះ ត្រូវបានលុបបំបាត់ចេញ ពីសតិអារម្មណ៍របស់ប្រជាពលរដ្ឋនិងក្រុមពន្លត់អគ្គិភ័យ ស្ទើរតែទាំងស្រុងហើយ ។ ចំណែកល្បែងស៊ីសងខុសច្បាប់ លោកអភិបាល បានណែនាំឲ្យបន្តយកចិត្តទុកដាក់បង្រ្កាប ដោយទីតាំងខ្លះមានច្បាប់ទម្លាប់ត្រឹមត្រូវ ក៏ត្រូវតែចុះអនុវត្តន៍ថាតើពួកគាត់អនុវត្តន៍បានត្រឹមត្រូវដែរឬទេ ។ ការអនុវត្តមានតែក្នុងក្រដាស ប៉ុន្តែការអនុវត្តជាក់ស្តែងមិនបានត្រឹមត្រូវនោះទេ៕ ដោយ ៖ បញ្ញាស័ក្តិ