ភ្នំពេញ ៖ រាជរដ្ឋាភិបាលកម្ពុជាតាមរយៈក្រសួងសាធារណការ និងដឹកជញ្ជូនកំពុងចរចាខ្ចីថវិកាពីធានាគារពិភពលោកប្រមាណ ១១០លានដុល្លារ ដើម្បីស្តារផ្លូវជាតិលេខ៤ឲ្យកាន់តែល្អប្រសើរបម្រើដល់ការធ្វើដំណើរ និងដឹកជញ្ជូន។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានឲ្យនៅថ្ងៃទី៣០ ខែឧសភា ឆ្នាំ២០១៨នេះថា
បច្ចុប្បន្នក្រសួងសាធារណការ និងដឹកជញ្ជូន និងធនាគារពិភពលោក បានបញ្ចប់ការចរចាឥណទាន កាលពីថ្ងៃទី១០ ខែឧសភា ឆ្នាំ២០១៨កន្លងទៅនេះ ហើយនឹងដាក់ជូនក្រុមប្រឹក្សានាយកធនាគារពិភពលោកសម្រេចក្នុងខែមិថុនា ឆ្នាំ២០១៨នេះ។
តាមរយៈប្រាក់កម្ចី ១១០លានដុល្លារនេះ ផ្លូវជាតិលេខ៤ នឹងត្រូវលើកកម្រិតគុណភាពឲ្យកាន់តែល្អប្រសើរ ដោយក្រាលកៅស៊ូ AC ស្ថាបនាចិញ្ចើមកៅស៊ូ AC និងបន្ថែមនូវប្រព័ន្ធប្រឡាយ ដែលចាំបាច់ ដើម្បីធានាផ្លូវជាតិលេខ៤នេះ អាចធ្វើដំណើរបានគ្រប់រដូវ ហើយការដ្ឋានលើកកម្រិតគុណភាពផ្លូវជាតិលេខ៤ អាចនឹងចាប់ផ្តើមការដ្ឋានសាងសង់នៅដើមឆ្នាំ២០១៩៕ ដោយ៖បញ្ញាស័ក្តិ