កំពង់ស្ពឺ ៖ កម្លាំងព្រហ្មទណ្ឌស្រុកសំរោងទង សហការជាមួយកម្លាំងផ្នែកសន្តិសុខ បានបង្ក្រាបទីតាំងលេងល្បែងស៊ីសង កត់កន្ទុយលេខវៀតណាម ដោយឃាត់ខ្លួនស្ត្រីម្នាក់ ជាអ្នកកត់ឆ្នោតកន្ទុយលេខ នៅភូមិឡ ឃុំកាហែង ស្រុកសំរោងទង ខេត្តកពង់ស្ពឺនៅថ្ងៃទី៣០ ខែឧសភា ឆ្នាំ២០១៨ វេលាម៉ោង ១៥និង៣០នាទី។
លោកវរសេនីយ៍ឯក ឃុត សុផល អធិការស្រុកសំរោងទងបានឲ្យដឹងថា ក្នុងប្រតិបត្តិការខាងលើកម្លាំងនគរបាលបានឃាត់ខ្លួនជនសង្ស័យម្នាក់ឈ្មោះ ជា ស្រីពៅ ភេទស្រី អាយុ ៤៥ឆ្នាំ ជាអ្នកទទួលកត់ឆ្នោតកន្ទុយលេខ រស់នៅទីតាំងខាងលើ។
ដកហូតវត្ថុតាងរួមមានៈ លុយចំនួន ២៣០៨០០រៀល ប៊ិច មួយដើម បន្ទាត់មួយ ម៉ាស៊ីនគិតលេខមួយ ក្រដាស់កាបោន ២សន្លឹក ក្រដាសកត់កន្ទុយលេខ៤សន្លឹក និងទូរស័ព្ទដៃមួយគ្រឿងម៉ាកសាំស៊ុង ពណ៌ខ្មៅ។
បច្ចុប្បន្នកម្លាំងជំនាញស្រុកកំពុងសាកសួរនិងកសាងសំណុំរឿងបញ្ជូនទៅសាលាដំបូងខេត្តដើម្បីចាត់ការតាមនីតិវិធី ៕ ដោយ៖បញ្ញាស័ក្តិ
