ភ្នំពេញ ៖ ភ្នាក់ងារសន្ដិសុខឯកជន ទទួលបៀវត្សរ៍ពីក្រុមហ៊ុនឯកជន តែពួកគេមានកាតព្វកិច្ចជាពលរដ្ឋល្អ ដែលមានតួនាទីមិនត្រឹមតែជាអ្នកការពារទ្រព្យសម្បត្តិឯកជន ឬសហគ្រាស គ្រឹះស្ថានឯកជនប៉ុណ្ណោះទេ តែក៏មានកាតព្វកិច្ចជួយការពារទ្រព្យសម្បត្តិសាធារណៈ សណ្ដាប់ធ្នាប់សង្គម និងអាយុជីវិតរបស់ប្រជាពលរដ្ឋផងដែរ។
វគ្គបណ្តុះបណ្តាលបំប៉នជំនាញភ្នាក់ងារសន្តិសុខឯកជន លើកទី៤ នៅព្រឹកថ្ងៃទី៣០ ខែឧសភា ឆ្នាំ២០១៨នេះ ដែលមានការចូលរួមពីតំណាងក្រុមហ៊ុនសន្តិសុខឯក ជិត២០០នាក់ ប្រធាននាយកដ្ឋានគ្រប់គ្រងសន្ដិសុខឯកជន នៃអគ្គស្នងការដ្ឋាននគរបាលជាតិ លោកឧត្តមសេនីយ៍ឯក លឹម សុខារស្មី បានគូសបញ្ជាក់ថា ភ្នាក់ងារសន្ដិសុខឯកជន ក៏មានតួនាទីជាកម្លាំងជំនួយ ដល់អាជ្ញាធរមានសមត្ថ កិច្ច ក្នុងកិច្ចការពារ ទប់ស្កាត់ បង្ក្រាបបទល្មើសនានា ដើម្បីឲ្យសង្គមមានសុខសុវត្ថិភាព ។
ឧត្តមសេនីយ៍ឯកប្រធាននាយកដ្ឋាន តែងតែយកចិត្តទុកដាក់ជំរុញ និងលើកទឹកចិត្តដល់វិស័យសន្តិសុខឯកជន នៅក្នុងប្រទេសកម្ពុជា ឲ្យទទួលបានទំនុកចិត្តក្នុងការប្រកបអាជីវកម្មរបស់ខ្លួន ដោយសុខស្ថិរភាព និងនិត្យានុកូលភាព ។
លោកឧត្តមសេនីយ៍ឯក លឹម សុខារស្មី ក៏បានណែនាំ និងជំរុញឲ្យបណ្ដាក្រុមហ៊ុនសន្ដិសុខឯកជនទាំងអស់ គួរតែបញ្ជូនភ្នាក់ងាររបស់ខ្លួនឲ្យមកចូលរួមក្នុងវគ្គបណ្ដុះបណ្ដាលបំប៉នជំនាញភ្នាក់ងារសន្តិសុខឯកជន ដើម្បីឲ្យភ្នាក់ងាររបស់ខ្លួនទទួលបាននូវបទពិសោធន៍ និងចំណេះផ្សេងៗ ដើម្បីបង្កើនសមត្ថភាពបន្ថែមទៀត ។ ជាមួយគ្នានេះ ក៏សូមឆ្លៀតឱកាសថ្លែងអំណរគុណដល់ក្រុមហ៊ុនផ្តល់សេវាសន្តិសុខឯកជន និងសហគ្រាស គ្រឹះស្ថានទាំងអស់ដែលបានចាត់បញ្ជូនភ្នាក់ងារសន្តិសុខឯកជនរបស់ខ្លួនមកទទួលការបណ្តុះបណ្តាលនេះ ហើយកន្លងមកតែងតែផ្តល់កិច្ចសហការល្អ ជាពិសេសបានគោរព និងអនុវត្តតាមសេចក្តីណែនាំនានារបស់ក្រសួងមហាផ្ទៃ ក៏ដូចជាបទដ្ឋានគតិយុទ្ធនានា របស់ព្រះរាជាណាចក្រកម្ពុជា ។
លោកឧត្តមសេនីយ៍ឯកប្រធាននាយកដ្ឋាន សង្ឃឹមយ៉ាងមុតមាំថា សិក្ខាកាមទាំងអស់ត្រូវក្រេបយកចំណេះដឹងទាំងនេះ ទៅបំពេញតួនាទីរបស់ខ្លួនក្នុងផ្លូវវិជ្ជមាន ប្រកបដោយប្រសិទ្ធភាពខ្ពស់ ដើម្បីការពារផលប្រយោជន៍ឯកជន សាធារណៈ និងសង្គមជាតិទាំងមូល ៕ ដោយ៖បញ្ញាស័ក្តិ