ខេត្តស្វាយរៀង ៖ លោក ហែម សារិទ្ធ អភិបាលរងស្រុកស្វាយជ្រំបានមានប្រសាសន៍ថា៖ ក្នុងនាមយើងជាយុវជនក៍ដូចជាសិស្សានុសិស្សទាំងអស់គ្នាត្រូវជួយការងារសង្គមឱ្យបានច្រើនមិនត្រូវផ្តោតទៅលើបញ្ហាលុយកាក់ជាធំនោះទេសំខាន់ត្រូវជួយសង្គមឱ្យបានច្រើន។ លោក ហែម សារិទ្ធ បានមានប្រសាសន៍ដូច្នេះក្នុងឱកាសដែលលោកបានអញ្ជើញជាអធិបតីនៅក្នុងពិធីបុណ្យរំលឹកគុណគ្រូលើកទី៣១ ខែឧសភា ឆ្នាំ២០១៨ នៃវិទ្យាល័យ ហ៊ុន សែន ដូន ស និងខួបលើកទី៦៩ទិវាកុមារអន្តរជាតិ១មិថុនា ដែលបានប្រព្រឹត្តទៅនាបរិវេនវិទ្យាល័យ ហ៊ុនសែន ដូន ស ស្ថិតក្នុងឃុំដូន ស ស្រុកស្វាយជ្រំ ខេត្តស្វាយរៀង ។
លោកអភិបាលរងស្រុកបានមានប្រសាសន៍បន្តទៀតថា៖ ការងារសង្គមមានច្រើនណាស់ដែលយុវជនយើងត្រូវចូលរួមជួយទាំងអស់គ្នាមានជាអាថ៍ៈ ការគោរពច្បាប់ចរាចរណ៍..បញ្ហាគ្រឿងញៀន…បញ្ហាបរិស្ថានជាដើមដែលយើងត្រូវធ្វើការផ្សព្វផ្សាយដល់មហាជនទូទៅឱ្យបានទូលំទូលាយដើម្បីចូលរួមអនុវត្តទៅតាមច្បាប់ដែលបានកំណត់។ ជាងនេះទៅទៀតយើងគ្រប់គ្នាត្រូវគិតថា លោកគ្រូ អ្នកគ្រូគឺជាមាតា បិតា ទី២ របស់យើងគួរគប្បីនាំគ្នាចូលរួមបង្កើតនូវកម្រងអនុស្សាវរីយ៍ល្អៗក្នុងវ័យសិក្សារបស់ខ្លួនដើម្បីទុកជាស្នាដៃគំរូដល់អ្នកជំនាន់ក្រោយយកទៅអនុវត្តបន្តទៀត។
ដោយឡែកលោក ម៉ៅ ឡងឌី នាយកវិទ្យាល័យហ៊ុនសែន ដូន ស បានមានប្រសាសន៍ឱ្យដឹងផងដែរថាៈផ្សាភ្ជាប់ទៅនិងពិធីបុណ្យរំលឹកគុណគ្រូលើកទី៣ឆ្នាំ២០១៨នៃវិទ្យាល័យ ហ៊ុន សែន ដូន ស សាលាក៍បានប្រារព្ធធ្វើខួបលើកទី៦៩ទិវាកុមារអន្តរជាតិ១មិថុនាតែម្តងដែលមនុស្សជាតិលើសកលលោកចងចាំមិនអាចបំភ្លេចបាននូវឧក្រិដ្ឋកម្មដ៍ព្រៃផ្សៃយង់ឃ្នងរបស់ពួកហ្វាសីុសអីុត្លែរ នៅថ្ងៃទី១០ខែមិថុនាឆ្នាំ១៩៤២ដែលបានសម្លាប់ប្រជាជនភូមិ លីឌីសែ “សាធារណរដ្ឋសហព័ន្ធឆែក និងស្លូវ៉ាក” ចំនួន១៩២នាក់ នៅក្នុងសួននៃកសិដ្ឋាន អូរ៉ាក់ ដែលក្នុងនោះកុមារ១០៥នាក់ត្រូវវាយកទៅសម្លាប់។ រំលងក្រោយថ្ងៃទី១០ខែមិថុនាឆ្នាំ១៩៤២ ពួកឧក្រិដ្ឋជនហ្វាសសីុសបានចាប់មនុស្សចំនួន១.១០០នាក់ដែលក្នុងនោះមានកុមារតូចៗចំនួន២០០នាក់ចាក់សាំងដុតកំឡោចទាំងរស់នៅអូរ៉ាឌូ ប្រទេសបារាំង ដែលវិនាសកម្មនេះហើយបានធ្វើឱ្យកម្លាំងស្នេហាសន្តិភាពគ្រប់ព៍ណសម្បុរ ក្រោកឈរឡើងធ្វើការតស៊ូដើម្បីប្រឆាំងសង្គ្រាមដែលបណ្តាលឱ្យកើតមហន្តរាយដល់ទ្រព្យសម្បត្តិនិងអាយុជីវិតមនុស្សជាតិនិង ដើម្បីការពារអាយុជីវិត ការពារសេរីភាព និងគាំពារបីបាច់ថែរក្សាកុមារលើផែនដីយើងនេះ។ ពិភពលោកបានកំណត់ថាៈ ០១មិថុនាជាទិវាចងកំហឹងឈឺចាប់ពុះពារ ហើយក៍ជាទិវាមួយដែលបំផុសស្មារតីដល់មនុស្សជាតិទាំងមូលឱ្យយកចិត្តទុកដាក់ចំពោះសុខុមាលភាពកុមារទាំងឡាយ និងជាទិវាសាមគ្គីអន្តរជាតិរបស់កុមារលើពិភពលោក។
លោក ម៉ៅ ឡងឌី បានមានប្រសាសន៍បញ្ជាក់ផងដែរថា៖ កាលពីឆ្នាំ១៩៧៥ដល់ឆ្នាំ១៩៧៩ ជាព្រឹត្តិការណ៍មួយទៀតកើតឡើងគួរឱ្យឈឺចាប់ខ្លោចផ្សាជាងឧក្រិដ្ឋកម្មរបស់ពួកហ្វាសសីុស អីុត្លែរនៅ លីឌីសែនិងអូរ៉ាឌូទៀតនោះគឺការប្រល័យពូជសាសន៍របស់របបខ្មែរក្រហមមកលើប្រជាជននិងកុមារកម្ពុជាប្រជាជននិងកុមារជាង៣លាននាក់ត្រូវស្លាប់យ៉ាងអណោចអធម័និងបានបន្សល់ទុកនូវកុមារកំព្រា ពិការ បាក់កំលាំងជាច្រើនសែននាក់ថែមទៀតផង។
កំហឹងឈឺចាប់បានធ្វើឱ្យប្រជាជនស្នេហាជាតិប្រមូលកម្លាំងក្រោកឡើងតស៊ូរើបំរាស់និងវាយផ្តួលរំលំរបបប្រល័យពូជសាសន៍រំដោះទឹកដីទាំងស្រុងនាថ្ងៃ៧មករាឆ្នាំ១៩៧៩ធ្វើឱ្យប្រជាជននិងកុមារកម្ពុជាត្រូវរួចផុតពីទារុណកម្មកាប់សម្លាប់ហើយបានរស់នៅប្រកបដោយសុភមង្គល៕ វ៉ៃកូ