ជីវិតក្មេងប្រុសតូចម្នាក់នៅក្នុងប្រទេសបារាំង ត្រូវបានជួយសង្គ្រោះ ដោយបានគុណបុណ្យដ៏អស្ចារ្យ ពីបុរសអន្តោសប្រវេសន៍សញ្ជាតិម៉ាលីម្នាក់ ដែលត្រូវបានគេដាក់ឈ្មោះឲ្យថា «វីរបុរសពីងពាង» បន្ទាប់ពីបានព្យាយាមឡើងតោងយ៉ាងក្លាហាន ដោយពុំគិតពុំអាយុជីវិតរបស់ខ្លួន ដើម្បីជួយសង្គ្រោះក្មេងម្នាក់នោះ ដែលកំពុងប៉ែលប៉ោលស្ថិតនៅរានមុខផ្ទះរបស់វានៅជាន់ទី៤ ដែលស្ទើរនឹងធ្លាក់ចុះមកដីទៅហើយ ។
វីដេអូដ៏សែនព្រឺព្រួចពីហេតុការណ៍នេះ នៅក្នុងទីក្រុងប៉ារីស បានបង្ហាញឲ្យឃើញក្មេងប្រុសតូចម្នាក់ កំពុងព្យួរខ្លួនតេកណោក ដើម្បីប្រយុទ្ធប្រឆាំងនឹងអាយុជីវិត ពីយ៉នៃអាគារផ្ទះរបស់វា ដែលធ្វើឲ្យមនុស្សម្នានៅខាងក្រោមរន្ធត់ចិត្តយ៉ាងខ្លាំងតែម្តង ។
អ្នកជិតខាងម្នាក់ បានកំពុងព្យាយាមជួយ ប៉ុន្តែ ជញ្ជាំងរវាងអគារ២ កសាងឡើងក្នុងលក្ខណៈពុំអាចឆ្លងកាត់បានទេ ។
មនុស្សម្នាជាច្រើន បានប្រមូលផ្តុំគ្នានៅខាងក្រៅ និងបានត្រឹមសម្លឹងមើលក្នុងភាពស្លុតរន្ធត់ប៉ុណ្ណោះ ។
ទោះយ៉ាងណា បុរសស្បែកខ្មៅម្នាក់ឈ្មោះ Mamoudou Gassama អាយុ ២២ ឆ្នាំ ដែលបានសម្លេងដ៏រំជួលចិត្តទាំងនោះ បានសម្រេចចិត្តតោងឡើងជញ្ជាំងអគារនោះ ដោយគ្មានបង្អង់យូរ ។ គាត់បានផ្លោះឡើងពីយ៉មួយទៅយ៉ផ្សេងៗទៀត រហូតទាល់ដល់ជាន់ទី៤ ខណៈហ្វូងមនុស្សទះដៃអបអររំភើបបំផុត ។
នៅទីបំផុត Gassama បានចាប់ដៃក្មេងប្រុសតូចនោះ រួចនាំយកវាទៅកាន់ទីកន្លែងសុវត្ថិភាព ។
ភាពអស្ចារ្យរបស់រូបនេះ បានធ្វើឲ្យប្រធានាធិបតីបារាំង Emmanuel Macron អញ្ជើញឲ្យមកកាន់វិមាន Elysée កាលពីថ្ងៃច័ន្ទ ដើម្បីផ្តល់វិញ្ញាបនប័ត្រកោតសរសើរ និងមេដៃមាសមួយ ចំពោះសកម្មភាពជួយសង្គ្រោះជីវិតមនុស្សដ៏ក្លាហាន និងការលះបង់របស់គាត់ ។
គួរបញ្ជាក់ថា Gassama គឺជាជនអន្តោប្រវេសន៍ម្នាក់ មកពី Mali ដែលបានមកដល់ក្នុងប្រទេសបារាំង អស់រយៈពេលជាច្រើនខែមកហើយ ។ គាត់បានអរគុណដល់ព្រះជាម្ចាស់ ដែលជួយគាត់សង្គ្រោះជីវិតក្មេងម្នាក់នោះ ។
គាត់ក៏ត្រូវបានគេសន្យាឲ្យចូលសញ្ជាតិបារាំង និងព្រមទាំងផ្តល់ការងារមួយធ្វើ នៅក្នុងនាយកដ្ឋានពន្លត់អគ្គីភ័យក្នុងតំបន់ផងដែរ ៕ ឧត្តម