ភ្នំពេញ៖ អង្គភាពស៊ីម៉ាក់បានទទួលជំនួយថវិកាចំនួន១,៦លានដុល្លារ ពីរដ្ឋាភិបាលអាមេរិក ដើម្បីធ្វើការបោសសម្អាតគ្រាប់បែកចង្កោម រយៈពេលមួយឆ្នាំលើផ្ទៃដី២.២០០ហិចតា នៅខេត្តភាគខាងកើតប្រទេសកម្ពុជា។ ជំនួយនេះត្រូវបានចុះហត្ថលេខានៅថ្ងៃទី៣១ ខែឧសភា ឆ្នាំ២០១៨នេះ នៅទីបញ្ជាការដ្ឋានស៊ីម៉ាក់ភ្នំពេញ ដោយលោក ហេង រតនា អគ្គនាយកស៊ីម៉ាក់ ជាមួយអង្គការ NPA ដែលគាំទ្រថវិកាដោយរដ្ឋាភិបាលសហរដ្ឋអាមេរិក តាមរយៈការិយាល័យកាត់បន្ថយអាវុធ នៃក្រសួងការបរទេសអាមេរិក។
លោកអគ្គនាយកស៊ីម៉ាក់ បានបញ្ជាក់ថា “ខ្ញុំបានចុំហត្ថលេខាទទួលការអនុវត្តគម្រោងរវាងអង្គភាពស៊ីម៉ាក់និងអង្គការNPA ដែលគាំទ្រថវិកាដោយរដ្ឋាភិបាលសហរដ្ឋអាមេរិកតាមរយៈការិយាល័យកាត់បន្ថយអាវុធនៃក្រសួងការបរទេសសហរដ្ឋអាមេរិក។ គម្រោងនេះមានថវិកាចំនួន១លាន៦សែនដុល្លារ មានរយៈពេល១២ខែ (១ មិនា ២០១៨-២៨ កុម្ភៈ ២០១៩) ដែលនេះជាឆ្នាំទី១នៃរយៈពេល២ឆ្នាំ ។ ជាមួយគម្រោងនេះស៊ីម៉ាក់នឹងពង្រាយកម្លាំងជិត២០០នាក់ ដែលផ្តោតជាសំខាន់លើការងារស្រាវជ្រាវព័ត៌មាននិងបោសសំអាតសំណល់គ្រាប់បែកចង្កោមនៅបណ្តាខេត្តខាងកើតប្រទេសកម្ពុជា។ គោលដៅគម្រោងនឹងរំដោះផ្ទៃដីគ្រាប់បែកចង្កោមចំនួន២.២០០ហិចតា និងស្រាវជ្រាវព័ត៌មាននៅ៦៧៨ភូមិ៕ ដោយ៖បញ្ញាស័ក្តិ