កណ្ដាល ៖ នៅថ្ងៃព្រហស្បត្តិ៍ទី៣១ ខែឧសភា ឆ្នាំ២០១៨ នៅសាលប្រជុំស្នងការដ្ឋាននគរបាលខេត្តកណ្តាល មានកិច្ចប្រជុំផ្សព្វផ្សាយនឹងត្រៀមលក្ខណ:សម្បត្តិដើម្បីការពារសុវត្ថិភាពដំណើរការបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨ ក្រោមអធិបតីឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាល។
លោកឧត្ដមសេនីយ៍ទោ អ៊ាវ ចំរើន ស្នងការនគរបាលខេត្ដកណ្ដាល បានថ្លែងថា ក្នុងនាមខ្លួនជានគរបាលជាតិត្រូវខិតខំពង្រីកចំណេះដឹងដើម្បីរកសុខជូនដល់បងប្អូនប្រជាពលរដ្ឋក្នុងដែនសមត្ថកិច្ចរបស់ខ្លួនមិនត្រូវយកអំណាចគាបសង្កត់ធ្វើឲ្យប្រជាពលរដ្ឋមានទុកលំបាកឡើយ។
លោកស្នងការបានជំរុញឲ្យមន្ដ្រីក្រោមឱវាទខិតខំរួមគ្នាត្រៀមលក្ខណៈសម្បត្ដិដើម្បីការពារសន្ដិសុខ សុវត្ថិភាពក្នុងដំណើរការបោះឆ្នោតជ្រើសតំណាងរាស្ដ្រនិតិកាលទី៦ ឆ្នាំ២០១៨។ ពិសេសត្រូវធ្វើការទប់ស្កាត់និងបង្ក្រាបជនណាដែលចេញមុខ ឬមានចេតនាទុច្ចរិតរារាំងប្រជាពលរដ្ឋមិនឲ្យទៅបោះឆ្នោត ។ “នៅសល់តែប៉ុន្មានថ្ងៃទៀតប៉ុណ្ណោះដំណើរការបោះឆ្នោតជ្រើសតាំងតំណាងរាស្ដ្រនីតិកាលទី៦ ឆ្នាំ២០១៨ នឹងឈានចូលមកដល់ ដូច្នេះពួកយើងជានគរបាលត្រូវខិតខំរួមគ្នា ការពារសន្ដិសុខ សណ្ដាប់ធ្នាប់ សុវត្ថិភាពក្នុងដំណើរការបោះឆ្នោតជ្រើសតាំងតំណាងរាស្ដ្រនេះឲ្យល្អប្រសើរ ” លោកស្នងការ បានលើកឡើងបន្ថែម។
លោកឧត្ដមសេនីយ៍ទោ អ៊ាវ ចំរើន បានបន្ថែមថា មន្ដ្រីនគរបាលទាំងអស់ត្រូវភ្ញាក់រលឹក ខិតខំអនុវត្ដន៍តួនាទី ភារកិច្ចរបស់ខ្លួនឲ្យបានល្អប្រសើរ ក្រៅពីការងារស្នូលត្រូវខិតខំ ពង្រីកចំណេះដឹងដើម្បីរកសុខជូនប្រជាពលរដ្ឋ នគរបាលគឺជាអ្នកបម្រើរាស្ដ្រដ៏ស្មោះត្រង់មិនមែនជាចៅហ្វាយនាយរបស់ប្រជាពលរដ្ឋនោះឡើយ៕ ដោយ៖បញ្ញាស័ក្តិ