នេះជាហេតុការណ៍ដ៏ស្លុតរន្ធត់មួយ ដែលបុរសតៃវ៉ាន់ម្នាក់បានប្រព្រឹត្តអំពើវាយប្រហារដូចកម្រោលចូល នៅភាគខាងជើងទីក្រុង Taoyuan កាលពីថ្ងៃអង្គារ (១៥ ឧសភា) ដែលបណ្តាលឲ្យមនុស្សម្នាក់ស្លាប់ និងម្នាក់ទៀតរងរបួស និងព្រមទាំងបំផ្លិចបំផ្លាញរថយន្តចំនួន ៧ គ្រឿង រងការខូចខាត ។
នៅវេលាម៉ោង ២ រសៀល ថ្ងៃកើតហេតុខាងលើ បុរសឈ្មោះ Wu អាយុ ២៥ ឆ្នាំ បានបើករថយន្តរបស់ខ្លួនបុកម៉ូតូ២គ្រឿង និងរថយន្ត១គ្រឿងដែលកំពុងថតនៅភ្លើងស្តុបមួយ នៅផ្លូវ Changshou ក្នុងស្រុក Guishan ទីក្រុង Taoyuan ។ អ្នកជិះម៉ូតូទាំងពីរបានរងរបួស ដោយក្នុងនោះបុរសអាយុ ៦៧ ឆ្នាំ ឈ្មោះ Wu បានរងរបួសក្បាលធ្ងន់ធ្ងរ និងម្នាក់ទៀតឈ្មោះ Kuo អាយុ ៤៩ ឆ្នាំ រងរបួសក្បាលស្រាល ។
បន្ទាប់បំផ្លិចបំផ្លាញយានយន្តទាំង៣ Wu បានបើករថយន្តចាកចេញយ៉ាងលឿន ប៉ុន្តែ ខណៈបើកបានចម្ងាយប្រហែល ៧៥០ ម៉ែត្រ ក៏បានបន្តបុកនឹងរថយន្ត ៣ គ្រឿងផ្សេងទៀត មុនពេលបុកជាមួយរថយន្តដឹកទំនិញ១គ្រឿង ។ បន្ទាប់រថយន្តរបស់ខ្លួនត្រូវជាប់គាំង Wu បានលោតចេញពីរថយន្ត និងចាប់ផ្តើមស្រាតខោអាវ ដោយនៅសល់តែលីអូពណ៌ក្រហម និងវាយប្រហារទៅលើអ្នកបើកបរ ដោយប្រើដំបង ។
បន្ទាប់មក បុរសរូបនេះក៏បានស្រាតលីអូចោលទៀត និងបន្តប្រើអាវុធរបស់ខ្លួន វាយទៅលើអ្នកបើកបរឆ្លងកាត់ជាច្រើន ។ ដោយពុំអាចឈរមើលពីអំពើដ៏សាហាវរបស់បុរសរូបនេះតទៅទៀត លែងបាន មនុស្សម្នាដែលស្ថិតនៅទីនោះ បាននាំចូលចាប់ផ្តួល Wu ទៅនឹងដីតែម្តង និងគ្រប់គ្រងរហូតដល់ប៉ូលីសចាប់ខ្លួន ។
ប៉ូលីសនិយាយថា ពួកគេពុំរកឃើញសារធាតុគ្រឿងស្រវឹងណាមួយ នៅក្នុងខ្លួនរបស់ជនដៃដល់រូបនេះទេ ប៉ុន្តែ ដោយសារតែ Wu ពុំឆ្លើយតបនឹងការសួរចម្លើយរបស់ប៉ូលីសៗ ក៏បន្តចាប់ផ្តើមធ្វើតេស្តរកសារធាតុគ្រឿងញៀន ។
ទោះយ៉ាងណា បន្ទាប់ទទួលការព្យាបាលរបួសស្រាលនៅមន្ទីរពេទ្យ Wu ត្រូវបានបញ្ជូនទៅការិយាល័យព្រះរាជអាជ្ញា ចំពោះអំពើបង្កសោកនាដកម្ម និងបំផ្លិចបំផ្លាញទ្រព្យសម្បត្តិដ៏ធំធេងនេះ និងព្យាយាមរត់គេចខ្លួនពីកន្លែងកើតហេតុបែបនេះ ៕ ចន្ទី