ភ្នំពេញ ៖ រដ្ឋបាលរាជធានីភ្នំពេញកំពុងត្រួតពិនិត្យទៅលើកិច្ចសហការជាមួយធនាគារ អេស៊ីលីដា ភីអិលស៊ី ក្នុងការដាក់ឲ្យដំណើរការ ការទូទាត់ប្រាក់តាមរយះQR Code ជាមួយកម្មវិធីអេស៊ីលីដាទាន់ចិត្តលើរថយន្តក្រុងរបស់រដ្ឋបាលរាជធានីភ្នំពេញ។
ជាក់ស្ដែងកាលពីរសៀលថ្ងៃទី៣១ខែឧសភាឆ្នាំ២០១៨នេះ លោក កើត ឆែ អភិបាលរងរាជធានីភ្នំពេញជួបប្រជុំជាមួយតំណាងធនាគារ អេស៊ីលីដានៅសាលារាជធានី។ ក្នុងកិច្ចប្រជុំនោះលោកអភិបាលរងរាជធានីបានជំរុញឲ្យផ្នែកពាក់ពន្ធ័ធ្វើការងារដាក់ប្រពន្ធ័ទូទាត់ប្រាក់បែបទំនើប(QR Code)តាមរយះទូរសព្ទ័ដៃនេះ ត្រូវធ្វើឲ្យបានលឿនដើម្បីសំរួលដល់ការទូទាត់ប្រាក់សំរាប់សេវាជិះរថយន្តដឹកជញ្ជូនសាធារណៈរថយន្តក្រុងរបស់រដ្ឋបាលរាជធានីភ្នំពេញ។
ក្នុងឱកាសនោះលោក អ៊ាន សុឃីម អភិបាលរដ្ឋករស្វយត័ដឹកជញ្ជូនសាធារណៈរថយន្តក្រុងបានឲ្យដឹងដែរថា៖ គោលបំណងសំខាន់របស់រដ្ឋបាលរាជធានីភ្នំពេញគឺ ការធ្វើកិច្ចសហការជាមួយកម្មវិធីអេស៊ីលីដាទាន់ចិត្តដោយដាក់ប្រពន្ធ័QR codeលើទូរសព្ទ័ដៃsmartphoneដើម្បីសំរួលដល់ការបង់ថ្លៃសេវាជិះរថយន្តក្រុងដល់ប្រជាពលរដ្ឋយើងឲ្យកាន់តែងាយស្រួល។លោក អ៊ាន សុឃីម បន្តទៀតថា៖សព្វថ្ងៃនេះរដ្ឋករស្វយត័ដឹកជញ្ជូនសាធារណៈរថយន្តក្រុង បានប្រើប្រាស់ជំរើស២រួចហើយក្នុងការបង់ថ្លៃសេវារថយន្តក្រុងនេះគឺទី១៖ទិញសំបុត្របង់ជាសាច់ប្រាក់សុទ្ធ,ទី២៖បង់តាមរយះម៉ាស៊ីនទូទាត់អេឡិចត្រូនិកNFDរបស់ក្រុមហ៊ុនWing ហើយនៅពេលនេះយើងនឹងដាក់ឲ្យដំណើរការការបង់ថ្លៃសេវាតាមរយះQR Code ដែលនឹងដាក់ឲ្យដំណើរការឆាប់ៗនេះ។លោកថ្លែងឲ្យដឹងទៀតថា៖បច្ចុប្បន្ននេះ រដ្ឋករស្វយត័ដឹកជញ្ជូនសាធារណៈរថយន្តក្រុងបានដាក់ឲ្យដំណើរការរថយន្តក្រុងចំនួន១៥៥គ្រឿង រត់លើតម្រាយផ្លូវចំនួន៨ខ្សែក្នុងរាជធានីភ្នំពេញហើយតាមការពិនិត្យជាក់ស្តែងឃើញថា៖បងប្អូនប្រជាពលរដ្ឋយើងបានងាកមកចាប់អារម្មណ៏ជិះឡានក្រុងរបស់រដ្ឋបាលរាជធានីភ្នំពេញកើនឡើងជាលំដាប់ដែលមានពី២ម៉ឺនទៅ២១០០០នាក់ក្នុង១ថ្ងៃ។ប្រជាពលរដ្ឋក៏បានសំណូមពរឲ្យរដ្ឋបាលរាជធានីភ្នំពេញដាក់បន្ថែមរថយន្តឲ្យបានច្រើនថែមទៀតនឹងឲ្យបានច្រើនផ្លូវក្នុងទីក្រុង។
ក្រោមការគិតគូដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គឺបងប្អូនកម្មករ កម្មការនី,កីឡាករកីឡាការនីអាជីព,ព្រះសង្ឃ,សិស្សនិសិត្ស,ជនពិការ លោកគ្រូអ្នកគ្រូ គឺទទួលបានការអនុគ្រោះជិះរថយន្តក្រុងរបស់រដ្ឋករស្វយត័ដឹកជញ្ជូនសាធារណៈរថយន្តក្រុងដោយមិនបង់ប្រាក់រយះពេល២ឆ្នាំ។លោក អ៊ាន សុឃីម បញ្ជាក់ថា៖ក្រោមជំនួយឥតសំណង រាជរដ្ឋភិបាលជប៉ុននឹងផ្តល់ជំនួយរថយន្តក្រុងថ្មីចំនួន៨០គ្រឿងដល់រាជធានីភ្នំពេញក្នុងឆ្នាំ២០១៨នេះ។ក្នុងនោះក្នុងខែមិថុនានេះនឹងមកដល់ចំនួន២០គ្រឿង,ខែកញ្ញាមកដល់៣០គ្រឿង និងខែធ្នូមកដល់៣០គ្រឿងទៀត៕ ដោយ ៖ បញ្ញាស័ក្តិ
