ខណៈដែលឪពុកធ្លាក់ខ្លួនឈឺធ្ងន់ តារាចម្រៀង ករុណា ពេជ្រ បានប្រកាស់លក់អចនៈទ្រព្យរបស់លោកជារឿយៗ ដើម្បីព្យាបាលជំងឺឪពុក ដែលក្នុងនោះមានដូចជាផ្ទះ ព្រមទាំងដីធ្លីជាច្រើនកន្លែង ។
រហូតមកទល់ពេលនេះ ជំងឺរបស់ឪពុកលោក ករុណា ពេជ្រ នៅតែស្ថិតក្នុងសភាពដេកដួលនៅឡើយ ដែលជាហេតុធ្វើឱ្យលោកនៅតែព្រួយបារម្ភ ប៉ុន្តែយ៉ាងណាមិញ ថ្មីៗនេះ តារាចម្រៀងម្ចាស់បទ «មកធ្វើអីបើមកមិនផឹក» ខាងលើបានបង្ហោះសារនៅលើគណនីហ្វេសប៊ុករបស់លោកថា ស្ថានភាពឪពុករបស់លោកបានគ្រាន់បើហើយ ប៉ុន្តែមិនទានអាចបើកភ្នែកបានទេ ។
លោក ករុណា ពេជ្រ បានសរសេរយ៉ាងដូច្នេះថា «ស្ថានភាព ប៉ា ខ្ញុំឥឡូវ គ្រាន់បើបានស្រស់ស្រាយជាងកាលនៅវៀតណាម… ប៉ុន្តែ គាត់បានត្រឹមតែបើក បិទភ្នែក តែប៉ុណ្ណោះ គឺមិនបានស្គាល់កូនចៅអីទេ…តែយ៉ាងណាក៏កូន នៅតែមានសង្ឃឹម ជានិច្ច…!!» ៕ សាវុធ
