នេះជាហេតុការណ៍គ្រោះថ្នាក់ចរាចរណ៍ដ៏សែនរន្ធត់មួយ ដែលបណ្តាលឲ្យស្ត្រីមានផ្ទៃពោះម្នាក់ ស្លាប់គួរឲ្យអាសូរបំផុត បន្ទាប់ពីនាងបានជិះម៉ូតូឆ្លងកាត់ផ្លូវប្រសព្វមួយកន្លែង នៅក្នុងទីក្រុង Hsinchu ប្រទេសចិន ហើយក៏ត្រូវរថយន្តតូច១គ្រឿងបើកបោះពួយយ៉ាងលឿន និងល្មើសភ្លើងសញ្ញាចរាចរណ៍ បុកនាងទាំងកម្រោលតែម្តង ។
យោងតាមប្រភពព័ត៌មាន បានឲ្យដឹងថា ស្ត្រីម្នាក់ឈ្មោះ Li អាយុ ៣១ ឆ្នាំ រស់នៅក្នុងទីក្រុង Hsinchu មានកូនប្រុសម្នាក់អាយុ ២ ឆ្នាំ និងឥឡូវនេះ មានផ្ទៃពោះកូនប្រុសម្នាក់អាយុ ៥ ខែ បន្ទាប់ពីបានរៀបការជាមួយប្តីជាទាហានម្នាក់ អស់រយៈពេលជាង ៤ ឆ្នាំ ។ កំណើតកូនប្រុសក្រោយនេះ នឹងត្រូវសម្រាលនៅក្នុងខែវិច្ឆិកាខាងមុខនេះ ។ ប៉ុន្តែ ជាអកុសល នាងក៏បានជួបគ្រោះថ្នាក់ចរាចរណ៍ដ៏រន្ធត់នេះ ស្លាប់ទាំងម្តាយ និងកូនតែម្តង ។
ប៉ូលីសបានឲ្យដឹងថា ហេតុការណ៍គ្រោះថ្នាក់ចរាចរណ៍នេះ ត្រូវបានបង្កឡើងដោយសិស្សប្រុសម្នាក់ ដែលបានបើកបររថយន្ត BMW គ្មានការប្រុងប្រយ័ត្ន និងព្រមទាំងល្មើស «ភ្លើងក្រហម» នៅចំណុចភ្លើងស្តុបកើតហេតុនោះ ខណៈពេលដែលជនរងគ្រោះបានជិះម៉ូតូ ស្របតាមភ្លើងខៀវអនុញ្ញាត ។
ក្នុងខណៈពេលគ្រោះថ្នាក់ដ៏រន្ធត់នេះ Li ត្រូវបានឃើញហោះឡើងលើ និងធ្លាក់ចូលក្រោមរថយន្ត ហើយដៃឆ្វេងរបស់នាង ត្រូវបានកម្ទេច និងក្បាលរបស់នាងស្រោចទៅដោយឈាម ។ Li ត្រូវបានប្រកាសស្លាប់ បន្ទាប់ពីបញ្ជូនទៅដល់មន្ទីរពេទ្យ ។
បច្ចុប្បន្ន ជនបង្កជាសិស្សសាលានោះ ដែលត្រូវបានកំណត់អត្តសញ្ញាណមានឈ្មោះ Wei Ming អាយុ ២១ ឆ្នាំ កំពុងរត់គេចខ្លួនពីការតាមចាប់របស់សមត្ថកិច្ច ៕ ឧត្តម
