ភ្នំពេញ៖ នារសៀលថ្ងៃព្រហស្បតិ៍ ទី៣១ ខែឧសភា ឆ្នាំ២០១៨លោក ឃួង ស្រេង អភិបាល នៃគណៈអភិបាលរាជធានីភ្នំពេញ បានទទួលជួបសម្ដែងការគួរសម និងពិភាក្សាការងារជាមួយ លោក យាន ឈីវហួយ ( YUAN QIUHUI ) អនុប្រធានក្រុមប្រឹក្សាពាណិជ្ជកម្មទីក្រុងផ្លូវសូត្រសមុទ្រ ( Sea and Land Silk Road City Alliance Business Council ) ស្ដីពីការស្វែងយល់ពីលទ្ធភាពនៃការអនុវត្តកិច្ចសហប្រតិបត្តិការអំពីការវិនិយោគលើវិស័យហេដ្ឋារចនាសម្ព័ន្ធ វិស័យកាត់ដេរ ការសាងសង់សណ្ឋាគារ ការនាំចេញ-ចូលវិស័យកសិកម្ម។
ក្នុងឱកាសនោះលោកឃួង ស្រេង បានជម្រាបជូនភ្ញៀវពីស្ថានភាពជាក់ស្តែង ក៏ដូចជាការវិវឌ្ឍរីកចម្រើន របស់កម្ពុជាលើគ្រប់វិស័យ ក្រោយពីប្រទេសជាតិ ត្រូវបានរំដោះចេញពីរបបប្រល័យពូជសាសន៍ប៉ុលពត។ ពេលនេះកម្ពុជាទទួលបានសុខសន្តិភាព ដ៏ពេញលេញពេញផ្ទៃប្រទេស ដែលជាមូលដ្ឋានគ្រឹះ សម្រាប់ការអភិវឌ្ឍក្រោមការដឹកនាំដ៏ឈ្លៀសវៃ របស់ស្ថាបនិកសន្តិភាព គឺសម្តេចអគ្គមហាសេនាបតីតេជោ ហ៊ុន សែន។ ដោយឡែកសម្រាប់រាជធានីភ្នំពេញ កំពុងទទួលបានការចាប់អារម្មណ៍យ៉ាងខ្លាំង ពីសំណាក់អ្នកទេសចរណ៍ និងអ្នកវិនិយោគមកពីគ្រប់តំបន់ ក្នុងនោះវិនិយោគិនចិន បានឈរនៅលំដាប់ទី១ ក្នុងការដាក់ទុនវិនិយោគនៅកម្ពុជា ក៏ដូចនៅរាជធានីភ្នំពេញ ហើយរាជធានីភ្នំពេញ ស្វាគមន៍ជានិច្ចចំពោះអ្នកវិនិយោគទាំងក្នុងនិងក្រៅប្រទេស រួមទាំងការជួយសម្របសម្រួល និងបង្កលក្ខណៈងាយស្រួល ដល់អ្នកវិនិយោគផងដែរ។
គួរបញ្ជាក់ផងដែរថា ៖ sea and land silk road ឬ “គម្រោងផ្លូវសូត្រមាស” គឺជាការអភិវឌ្ឍហេដ្ឋារចនាសម្ព័ន្ធដឹកជញ្ជូនទាំងតាមផ្លូវគោក និងផ្លូវទឹក តភ្ជាប់ពីប្រទេសមួយទៅប្រទេសមួយ ដើម្បីបង្កើតជាខ្សែបណ្តាញនៃការដោះដូរពាណិជ្ជកម្មចាប់ពីចិន តភ្ជាប់ទៅអាស៊ី និងបន្តរហូតទៅដល់តំបន់អឺរ៉ុប និងអាហ្វ្រិក ដោយគម្រោងនេះត្រូវចំណាយលុយរហូតដល់ទៅរាប់រយពាន់លានដុល្លារ ៕ ដោយ៖បញ្ញាស័ក្តិ