នៅយប់ថ្ងៃទី ៣០ ខែឧសភា កន្លងមកនេះ ប្រជានេសាទឈ្មោះ Le Van Su បានរាយសំណាញ់ ហើយចាប់ត្រីចម្លែកមួយមានទម្ងន់ ៣,៥គីឡូក្រាម ប្រវែង ៦០សង់ទីម៉ែត្រ ។ ដោយពុំទាន់ប្រាកដក្នុងចិត្ត គាត់ក៏សាកសួរដល់អ្នកនេសាទជើងចាស់ ទើបប្រាកដថា វាជាត្រីមាសដ៏កម្រ ។
លោកនិយាយថា ៖ ខ្ញុំប្រកបរបរនេសាទនៅតំបន់នេះ តាំងពីនៅក្មេងម្លេះ ហើយវាជាលើកដំបូងដែលខ្ញុំនេសាទបានត្រីនេះ ។ បច្ចុប្បន្នត្រីនេះនៅរស់ ហើយត្រូវបានចិញ្ចឹមនៅក្នុងអាងធ្វើពីស៊ីម៉ងត៍មួយ ។ លោកប្រាប់ថា គ្រាន់តែត្រីនេះឡើងលើគោកភ្លាមពួកឈ្មួញមកទិញដោយហ៊ានឲ្យតម្លៃខ្ពស់ដល់ទៅ ១,៥ពាន់លានដុង (ប្រមាណប្រហែល ៦៥.៧០០ដុល្លារអាមេរិក) ប៉ុន្តែខ្ញុំមិនទាន់លក់ ព្រោះប្រភេទត្រីនេះ មានតម្លៃខុសគ្នារវាងត្រីងាប់ និងត្រីរស់ ។
ត្រីមាសតាមវៀតណាមហៅមានឈ្មោះវិទ្យាសាស្ត្រថា Otolithoides biauritus ស្ថិតក្នុងអម្បូរ Sciaenidae វារស់នៅរាយប៉ាយ នាប្រទេសឥណ្ឌា ឥណ្ឌូនេស៊ី ស្រីលង្ការ ចិន និងវៀតណាម ។ អម្បូរត្រីនេះច្រើនរស់នៅតាមច្រក តភ្ជាប់ទន្លេ និងសមុទ្រ ។
តម្លៃរបស់ត្រីនេះថ្ងៃព្រោះតែវាកម្រមាន ហើយក្រពះរបស់វាត្រូវបានយកមកធ្វើជាវត្ថុធាតុដើមសម្រាប់ផលិតសូត្រវះកាត់ដែលរលាយចូលក្នុងសាច់ ។
