ប៉ូលីសក្នុងទីក្រុង Wildwood បានបញ្ចេញវីដេអូមួយ បង្ហាញឲ្យឃើញការប្រឈមមុខដាក់គ្នា រវាងមន្ត្រីសមត្ថកិច្ច និងស្ត្រីអាយុ ២០ ឆ្នាំ ម្នាក់ នៅលើឆ្នេរសមុទ្រនៃទីក្រុងនេះ កាលពីថ្ងៃរសៀលចុងសប្តាហ៍មុននេះ ដែលពួកគេបានចោទប្រកាន់ថាស្ត្រីរូបនោះផឹកស្រាស្ថិតក្រោមអាយុអនុញ្ញាត ។
ហេតុការណ៍នេះ បានទទួលការចាប់អារម្មណ៍យ៉ាងខ្លាំង ពីសំណាក់ប្រជាអ៊ីនធើរណេតនៅជុំវិញពិភពលោក នៅដើមសប្តាហ៍នេះ បន្ទាប់ពីអ្នកទៅលេងឆ្នេរសមុទ្រម្នាក់ បានបង្ហោះវីដេអូនេះទៅកាន់បណ្តាញសង្គម ដោយបង្ហាញមន្ត្រីម្នាក់ដាល់ទៅលើស្ត្រីឈ្មោះ Emily Weiman នៅត្រង់ក្បាល ក្នុងអំឡុងពេលចាប់ខ្លួន ។
Weinman អាយុ ២០ មកពី Philadelphia ត្រូវបានចោទប្រកាន់ផ្គើននឹងមន្ត្រី, ធាត់ និងស្តោះទឹកមាត់ដាក់ពួកគេ ក្នុងអំឡុងពេលត្រួតពិនិត្យ ។
ស្ត្រីរូបនេះបានកំពុងអង្គុយលេងជាមួយកូនស្រីរបស់នាងអាយុ ១៨ ខែ និងមិត្តប្រុសរបស់នាង មុនពេលប្រឈមមុខយ៉ាងខ្លាំងក្លាជាមួយសមត្ថកិច្ច បន្ទាប់ពីពួកគេបានរកឃើញថានាងកំពុងផឹកតែទឹកកកមានសារជាតិអាល់កុល នៅក្នុងពេលលំហែកាយរបស់នាងនៅលើឆ្នេរខ្សាច់ ។
ស្ថានភាពនេះកាន់តែក្តៅគគុក នៅពេល Weinman បដិសេធផ្តល់ឈ្មោះរបស់នាងដល់មន្ត្រី ។ ហើយនាងបាននិយាយទៅកាន់មន្ត្រីម្នាក់ មុនពេលចំណុចមួយចាកពីគាត់ថា៖ «លោកពុំត្រូវការចង់ដឹងឈ្មោះរបស់ខ្ញុំឡើយ» ។
ឆ្លើយតបជាមួយកាយវិការបែបនេះរបស់នាង មន្ត្រីរូបនោះ ក៏បានស្នើសុំមន្ត្រីម្នាក់ទៀត ឲ្យចូលដាក់ខ្នោះនាង ហើយ Weiman បានស្រែកខ្លាំងៗឡើងថា «សូមកុំចូលមកប៉ះពាល់ខ្ញុំឲ្យសោះ» ។
ទោះយ៉ាងណា មន្ត្រីរូបនោះក៏បានដាល់នាង១ដៃថែមទៀត ព្រោះតែនាងរឹងទទឹងនឹងការចាប់ខ្លួន ៕ ចន្ទី