នៅថ្ងៃទី ៣១ ខែឧសភា គណៈកម្មាធិការបោះឆ្នោតថៃ (EC) បានអនុម័តថាប្រមុខការទូត Don Pramudwinai របស់ប្រទេសនេះ “អាចមិនគ្រប់លក្ខណៈសម្បតិ្ត” ដើម្បីបន្តរក្សាមុខតំណែងនេះ ព្រោះតែបានបំពាននឹងការកំណត់មិនឲ្យមន្ត្រីថ្នាក់រដ្ឋមន្ត្រី និងភរិយា ឬស្វាមី កំពុងស្ថិតក្នុងមុខតំណែងនេះ ក្តោបក្តាប់ភាគហ៊ុនរបស់ក្រុមហ៊ុន ។
ករណីនេះ ត្រូវបានដាក់ជូនតុលាការធម្មនុញ្ញពិនិត្យ ។
ប្រមុខការទូតថៃ Don Pramudwinai
ពាក្យបណ្តឹងចំពោះលោក Don Pramudwinai ដែលបំពានបទកំណត់ខាងលើ ត្រូវបានគណបក្សភឿថៃ ចោទប្រកាន់កាលពីខែឧសភា ឆ្នាំទៅម៉ិញ ។ នៅក្នុងការចោទប្រកាន់នេះ មានមន្ត្រីកំពុងស្ថិតក្នុងមុខតំណែង ៨ រូបទៀត ហើយខ្លះក៏បានចូលនិវត្តន៍ក្នុងរដ្ឋការយោធាថៃ ។ តាមមាត្រា ១៨៧ នៃរដ្ឋធម្មនុញ្ញឆ្នាំ ២០១៧ មុខតំណែងរដ្ឋមន្ត្រីត្រូវបានហាមឃាត់មិនឲ្យក្តោបក្តាប់ភាគហ៊ុន ក្នុងក្រុមហ៊ុន ហើយប្រសិនបើចង់ទទួលបានផលចំណេញពីភាគហ៊ុនដែលខ្លួនកំពុងមាននោះ ត្រូវតែរាយការឲ្យគណៈកម្មាធិការជាតិប្រឆាំងអំពើពុករលួយ (NACC) ក្នុងអំឡុងពេល ៣០ថ្ងៃយ៉ាងយូរក្រោយពេលត្រូវបានតែងតាំង ។
ចំនួនភាគហ៊ុនទាំងនោះក៏នឹងត្រូវបានផ្ទេរ ទៅកាន់មូលនិធិវិនិយោគទ្រព្យសម្បត្តិមួយជាអ្នកគ្រប់គ្រង។ បទកំណត់នេះត្រូវបានអនុវត្តចំពោះប្រពន្ធឬប្តីដែលកំពុងស្ថិតក្នុងមុខតំណែងជាសមាជិករដ្ឋាភិបាល ។
បច្ចុប្បន្ន EC ក៏កំពុងស៊ើបអង្កេតការចោទប្រកាន់របស់គណបក្សភឿថៃចំពោះរដ្ឋមន្ត្រី ៣រូបទៀត គឺរដ្ឋមន្ត្រីគមនាគមន៍ Pailin Chuchottaworn រដ្ឋមន្ត្រីវិទ្យាសាស្ត្រនិងបច្ចេកវិទ្យា Suvit Maesincee និងរដ្ឋមន្ត្រីអប់រំ Teerakiat Jareonsettasin រួមជាមួយសមាជិក ៩០ រូបទៀតរបស់ក្រុមប្រឹក្សានីតិបញ្ញត្តិជាតិ (NLA) ព្រមទាំងរដ្ឋសភាថៃ ៕ សូយន
