ភ្នំពេញ៖ ក្រសួងការងារ និងបណ្ដុះបណ្ដាលវិជ្ជាជីវៈ បានចេញសេចក្ដីជូនដំណឹងថា ដោយក្ដាប់បាននូវស្ថានភាពជាក់ស្ដែងពីតម្រូវការចាំបាច់ និងកង្វល់របស់កម្មករ ដែលត្រូវថៅកែរោងចក្ររត់ចោលនោះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសម្រេចផ្ដល់បុរេប្រទានថវិកាសម្រាប់ទូទាត់ប្រាក់ឈ្នួល និងប្រាក់អត្ថប្រយោជន៍ ជូនកម្មករដែលធ្លាប់បម្រើការងារនៅក្នុងរោងចក្រចំនួន៩។
សេចក្ដីជូនព័ត៌មានរបស់ក្រសួងការងារ បានបញ្ជាក់ថា រោងចក្រទាំង៩នោះ រួមមាន៖ នៅរាជធានីភ្នំពេញមាន៥រោងចក្រ នៅខេត្តកណ្ដាលមាន ១រោងចក្រ និងនៅខេត្តកំពង់ស្ពឺមាន៣រោងចក្រ។
ក្រសួងការងារនិងបណ្តុះបណ្តាលវិជ្ជាជីវៈ សូមជូនដំណឹងដល់បងប្អូនអតីតកម្មករនិយោជិត នៅ រោងចក្រកែវី នៅភូមិបុសតានៃ ឃុំកាហែរ ស្រុកសំរោងទង ខេត្តកំពង់ស្ពឺ សូមមេត្តាពិនិត្យបញ្ជី និងបើកប្រាក់ឈ្នួល និងប្រាប់អត្ថប្រយោជន៍ជូនកម្មករនិយោជិត ហើយបើកប្រាក់ដោយផ្ទាល់ដល់សាម៉ីខ្លួន នៅមន្ទីរការងារ និងបណ្តុះបណ្តាលវិជ្ជាជីវៈ ខេត្តកំពង់ស្ពឺ ចាប់ពីថ្ងៃទី៧ ខែមិថុនា ឆ្នាំ២០១៨ រហូតដល់ ថ្ងៃទី១៥ ខែមិថុនា ឆ្នាំ២០១៨ រៀងរាល់ម៉ោងធ្វើការ។
កម្មករនិយោជិតត្រូវយកមកជាមួយនូវឯកសារដូចខាងក្រោម៖១. កាតសម្គាល់ខ្លួនកម្មករនិយោជិតក្នុងរោងចក្រ (ច្បាប់ដើម) ឬសៀវភៅការងារ ឬប័ណ្ណបេឡាជាតិរបបសន្តិសុខសង្គម ឬអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែន ឬកិច្ចសន្យាការងារ។ ២. ប័ណ្ណបើកប្រាកឈ្នួលប្រចាំខែរបស់កម្មករនិយោជិតម្នាក់ៗ (បើមាន)។
ក្រសួងការងារនិងបណ្តុះបណ្តាលវិជ្ជាជីវៈ សូមជូនដំណឹងដល់បងប្អូនអតីតកម្មករនិយោជិត នៅរោងចក្រអេវើរ៉ាយថិចស្ពាយ នៅភូមិរំដួល ឃុំត្រពាំងគង ស្រុកសំរោងទង ខេត្តកំពង់ស្ពឺ សូមមេត្តាពិនិត្យបញ្ជី និងបើកប្រាក់ឈ្នួល និងប្រាប់អត្ថប្រយោជន៍ជូនកម្មករនិយោជិត ហើយបើកប្រាក់ដោយផ្ទាល់ដល់សាម៉ីខ្លួន នៅមន្ទីរការងារ និងបណ្តុះបណ្តាលវិជ្ជាជីវៈ ខេត្តកំពង់ស្ពឺ ចាប់ពីថ្ងៃទី៧ ខែមិថុនា ឆ្នាំ២០១៨ រហូតដល់ ថ្ងៃទី១៥ ខែមិថុនា ឆ្នាំ២០១៨ រៀងរាល់ម៉ោងធ្វើការ៕ ដោយ៖បញ្ញាស័ក្តិ
