ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) បានចេញសេចក្ដីបំភ្លឺ ស្ដីពីការគូសសញ្ញាគាំទ្រគណបក្សនយោបាយ នៅលើសន្លឹកឆ្នោត ដើម្បីជាភាពងាយស្រួល ដល់ប្រជាពលរដ្ឋអ្នកបោះឆ្នោត។
កន្លងមកថ្មីៗនេះ មានការលើកឡើងផ្សេងៗគ្នាពាក់ព័ន្ធនឹងការគូសសញ្ញាគាំទ្រគណបក្សនយោបាយនៅលើសន្លឹកឆ្នោត ដែលប្រការនេះបានធ្វើឲ្យសាធារណជនទូទៅ ពិសេសប្រជាពលរដ្ឋអ្នកបោះឆ្នោតមានភាពស្រពេចស្រពិល អំពីគំនូសសញ្ញាគាំទ្រនេះ។
បើយ៉ោងតាមសេចក្ដីបំភ្លឺរបស់ គ.ជ.បនៅថ្ងៃទី១ ខែមិថុនានេះ គ.ជ.ប លើកទឹកចិត្តឲ្យអ្នកបោះឆ្នោតគូសសញ្ញា ធិក ជាសញ្ញាគាំទ្រគណបន្សនយោបាយ ដែលខ្លួនពេញចិត្តនៅលើសន្លឹកឆ្នោត។
អនុលោមតាមមាត្រា១០២ កថាខណ្ឌទី៤ នៃច្បាប់ស្តីពីការបោះឆ្នោត ជ្រើសតាំងតំណាងរាស្ត្ររបៀបគូសសន្លឹកឆ្នោត និងដាក់សន្លឹកឆ្នោតចូលក្នុងហិបឆ្នោត ត្រូវកំណត់ដោយបទបញ្ជា និងនីតិវិធីរបស់គ.ជ.ប។
យោងចំណុច៨.១១.១ នៃបទបញ្ជា និងនីតិវិធីសម្រាប់ការបោះឆ្នោតជ្រើសតាំងតំណាងរាស្ត្រ “សន្លឹកឆ្នោតបានការ គឺជាសន្លឹកឆ្នោតផ្លូវការដែលបានផ្តល់ជូនដោយគ.ជ.ប សម្រាប់ការបោះឆ្នោតជ្រើសតាំងតំណាងរាស្ត្រតាមមណ្ឌលរាជធានី ខេត្តនីមួយៗ និងមានបោះត្រាសម្ងាត់នៃការិយាល័យបោះឆ្នោតពាក់ព័ន្ធនៅផ្នែកខាងខ្នង ហើយដែលនៅលើសន្លឹកឆ្នោតនោះ អ្នកបោះឆ្នោតបានបញ្ជាក់យ៉ាងច្បាស់ពីឆន្ទៈរបស់ខ្លួន ដោយមានគូសសញ្ញាគាំទ្រ ក្នុងប្រអប់បួនជ្រុងទ្រវែងនៃគណបក្សនយោបាយណាមួយដែលគាត់ពេញចិត្ត”។
យោងចំណុច ៨.៦.១៤.២ នៃបទបញ្ជា និងនីតិវិធី សម្រាប់ករបោះឆ្នោតជ្រើសតាំងតំណាងរាស្ត្រ “…អ្នកបោះឆ្នោតត្រូវគូសសញ្ញាគាំទ្រនៅក្នុងប្រឡោះបួនជ្រុងទ្រវែងនៃគណបក្សនយោបាយ ដែលខ្លួនពេញចិត្ត”។
គ.ជ.ប បញ្ជាក់ទៀតថា សន្លឹកឆ្នោតមានគំនូសសញ្ញាគាំទ្រផ្សេងពីនេះ ដែលនាំឲ្យគេសម្គាល់បាន នូវអត្តសញ្ញាណរបស់អ្នកបោះឆ្នោត ដូចជា សន្លឹកឆ្នោតមានសរសេរពាក្យពេចន៍ ពាក្យអធិប្បាយ សន្លឹកឆ្នោតមានផ្ដិតស្នាមម្រាមដៃ សន្លឹកឆ្នោតមានបិទតែម ឬក្រដាសប្រាក់ ឬក្រដាសមានសំណេរ ឬសញ្ញាផ្សេងសន្លឹកឆ្នោតមានឯកសារផ្សេងៗបិទ ឬខ្ទាស់ជាប់ជាមួយ សន្លឹកឆ្នោតមានសរសេរឈ្មោះ ឬហត្ថលេខា ឬសញ្ញាណដែលនាំឲ្យគេស្គាល់អ្នកបោះឆ្នោត។ សន្លឹកឆ្នោតទាំងនេះ ត្រូវបានចាត់ទុកថាជាសន្លឹកឆ្នោតមិនបានការ ដូចកំណត់ក្នុងចំណុច ៨.១១.២.៣ នៃបទបញ្ជា និងនីតិវិធី សម្រាប់ការបោះឆ្នោតជ្រើសតាំងតំណាងរាស្ត្រ៕ ដោយ៖បញ្ញាស័ក្តិ