កណ្តាល៖ បុរសម្នាក់ដែលគេស្គាល់ថាជាគ្រូថ្នាំខ្មែរ ត្រូវបានសមត្ថកិច្ចនគរបាលស្រុកស្អាង ចាប់ខ្លួនពាក់ព័ន្ធ ករណីលបលួចលក់ថ្នាំញៀន នៅថ្ងៃសុក្រ ទី១ ខែ មិថុនា ឆ្នាំ២០១៨ វេលាម៉ោង ១៦ ស្ថិតក្នុងភូមិ ធំ ឃុំក្រាំងយ៉ូវ ស្រុកស្អាង ខេត្តកណ្តាល ។
នគរបាលមូលដ្ឋាន បានឲ្យដឹងថា ជនសង្ស័យឈ្មោះ យឿន យុន ហៅ គ្រូពូ ភេទប្រុស អាយុ ៣៦ឆ្នាំ ជនជាតិខ្មែរ មុខរបរគ្រូថ្នាំខ្មែរ ទីលំនៅបច្ចុប្បន្នភូមិ ធំ ឃុំក្រាំងយ៉ូវ ស្រុកស្អាង ខេត្តកណ្តាល ។ វត្ថុតាងចាប់យករួមមាន៖ ម្សៅក្រាមពណ៌សថ្លាសង្ស័យថាជាសារធាតុញៀន(ម៉ាទឹកកក) ចំនួន៤កញ្ចប់ ក្នុងនោះ ធំ ១កញ្ចប់ តូច ៣កញ្ចប់ និងកាតូទឹកមាន់ ចំនួន ២ ។
នគរបាលដែលចុះប្រតិបត្តិការ បានឲ្យដឹងថា នៅថ្ងៃទីខែឆ្នាំ វេលាម៉ោងកើតហេតុខាងលើ ក្រោយទទួលបានព័ត៌មានពីប្រជាពលរដ្ឋល្អថា មានករណីជួញដូរគ្រឿងញៀន នៅចំណុចនោះ កម្លាំងផ្នែកប្រឆាំងបទល្មើសគ្រឿងញៀន សហការជាមួយ កម្លាំងប៉ុស្តិ៍នគរបាលក្រាំងយ៉ូវ និងក្រុមប្រឹក្សាឃុំ បានចុះដល់ចំណុចកើតហេតុ ធ្វើការត្រួតពិនិត្យ ឆែកឆេរ បន្ទប់លក់ឥវ៉ាន់ចាប់ហួយរបស់ជនសង្ស័យឈ្មោះ យឿន យុន បានរកឃើញម្សៅក្រាមពណ៌សថ្លាសង្ស័យជាសារធាតុញៀន (ម៉ាទឹកកក) ចំនួន ៤កញ្ចប់ (ធំ១កញ្ចប់ តូច៣កញ្ចប់) លាក់ទុកក្នុងកាតូទឹកមាន់ (គ្មានទឹក) រួចឃាត់ខ្លួនជនសង្ស័យ រួមនឹងវត្ថុតាង ដើម្បីសាកសួរ ។
នៅចំពោះមុខសមត្ថកិច្ចនគរបាល ឈ្មោះ យឿន យុន បានសារភាពថា ឈ្មោះ តឿ ភេទប្រុស អាយុ ២៥ឆ្នាំ ទីលំនៅវាលខ្សាច់ សង្កាត់ចាក់អង្រែ រាជធានីភ្នំពេញ បានឲ្យគ្រឿងញៀន(ម៉ាទឹកកក) ចំនួន ១កញ្ចប់ មកខ្លួន (យឿន យុន) ។ ឈ្មោះ យឿន យុន បានរំលែកគ្រឿងញៀន(ម៉ាទឹកកក) លក់ក្នុង ១កញ្ចប់តូច តម្លៃ ២០.០០០រៀល លក់អស់ចំនួន ១០កញ្ចប់ រួចមកហើយ ។
បច្ចុប្បន្នជនសង្ស័យបានឃាត់ខ្លួន នៅអធិការដ្ឋាននគរបាលស្រុកស្អាង ដើម្បីបន្ដអនុវត្ដតាមនីតិវីធី ៕ ដោយ៖បញ្ញាស័ក្តិ