ភ្នំពេញ ៖ ឯកអគ្គរាជទូតថៃប្រចាំព្រះរាជាណាចក្រកម្ពុជា បានអះអាងថា នឹងបន្តកិច្ចសហប្រតិបត្តិការល្អ ជាប្រពៃណី រវាងប្រទេសទាំងពីរ កម្ពុជាថៃ ជាពិសេស ជំរុញនិងពង្រីកកិច្ចសហប្រតិបត្តិការសេដ្ឋកិច្ចលើវិស័យដែលមានសក្តានុពលខ្ពស់។
លោកអគ្គបណ្ឌិតសភាចារ្យទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានជួបពិភាក្សាការងារជាមួយលោក Panyarak Poolthup ឯកអគ្គរាជទូតថៃប្រចាំព្រះរាជាណាចក្រកម្ពុជា នាឱកាសដែលលោកឯកអគ្គរាជទូតទើបចូលកាន់តំណែង នាព្រឹកថ្ងៃទី៣១ ខែ ឧសភា ឆ្នាំ ២០១៨ នៅទីស្តីការក្រសួងសេដ្ឋកិច្ច និងហិរញ្ញវត្ថុ ។
លោក Panyarak Poolthup បានលើកឡើងថា ប្រទេសយើងទាំងពីរ កម្ពុជានិងថៃ គឺជាមិត្តដ៏ជិតស្និទ្ធជាយូរលង់ណាស់មកហើយ និងមានទំនាក់ទំនង និងកិច្ចសហប្រតិបត្តិការជាមួយគ្នាសឹងតែលើគ្រប់វិស័យ។
លោកអគ្គបណ្ឌិតសភាចារ្យទេសរដ្ឋមន្ត្រី អូន ព័ន្ធមុនីរ័ត្ន បានគូសបញ្ជាក់ថា ចំណងការទូត មិត្តភាព និងកិច្ចសហប្រតិបត្តិការរវាងប្រទេសទាំងពីរ កម្ពុជានិងថៃ ត្រូវបានពង្រឹង និងពង្រីកឥតឈប់ឈរ ហើយបានរួមចំណែកយ៉ាងធំធេង ដល់ការអភិវឌ្ឍ សេដ្ឋកិច្ច និងសង្គមនៃប្រទេសទាំងពីរ។
ជាក់ស្តែង ក្នុងក្របខ័ណ្ឌសហប្រតិបត្តិការហិរញ្ញវត្ថុ ប្រទេសថៃ បានផ្តល់ឥណទានសម្បទាន និងហិរញ្ញប្បទានឥតសំណងសម្រាប់អនុវត្តគម្រោងជាច្រើន នៅកម្ពុជា មានដូចជា គម្រោងអភិវឌ្ឍន៍ផ្លូវជាតិលេខ៤៨ គម្រោងស្តារឡើងវិញផ្លូវជាលេខ៦៧ (ជាំសាង៉ាំ អន្លង់វែង សៀមរាប) និងគម្រោងរៀបចំច្រកទ្វារអន្តរជាតិស្ទឹងបត់ និងផ្លូវតភ្ជាប់ផ្លូវជាតិលេខ៥ ជាដើម។ ប្រទេសទាំងពីរ បានចុះកិច្ចព្រមព្រៀងស្តីពីការចៀសវាងយកពន្ធត្រួតគ្នា ដែលផ្តល់ភាពងាយស្រួលដល់ការវិនិយោគ និងពាណិជ្ជកម្ម។ កិច្ចសហប្រតិបត្តិការរវាងរដ្ឋបាលគយនិងគណៈកម្មការមូលបត្រនៃប្រទេសទាំងពីរ ក៏បានវឌ្ឍនភាពគួរឲ្យកត់សម្គាល់ផងដែរ៕ ដោយ៖បញ្ញាស័ក្តិ
