សាលាបច្ចេកទេសមួយនៅក្នុងខេត្ត Guangdong ប្រទេសចិន បានជួបហេតុការណ៍ដ៏រន្ធត់មួយ បន្ទាប់ពីនិស្សិតស្រីអាយុ ១៩ ឆ្នាំម្នាក់ បានធ្លាក់ស្លាប់ ខណៈកំពុងរៀនខ្លួនឯង នៅយ៉មុខថ្នាក់រៀនជាន់ទី៣ ។
យោងតាមកាសែត xuehua ចុះផ្សាយឲ្យដឹងថា និស្សិតស្រីឈ្មោះ Su Mouping អាយុ ១៩ ឆ្នាំ ក្នុងអំឡុងក្រៅម៉ោងសិក្សា បានទៅឈរមើលមេរៀន ដោយផ្អែកនឹងបង្កាន់ដៃកញ្ចក់ការពារ នៃយ៉មុខថ្នាក់រៀនរបស់នាង ។ ប៉ុន្តែ ជាអកុសល ស្រាប់តែបង្កាន់ដៃនោះបានបាក់ បណ្តាលឲ្យនាងធ្លាក់ចុះដីរងរបួសធ្ងន់ធ្ងរតែម្តង នៅវេលាម៉ោង ៣ និង ៣៥ នាទី រសៀល ថ្ងៃទី២៤ ឧសភា ។
ក្រោយហេតុការណ៍កើតឡើង ភ្លាមៗនោះ គេក៏បានបញ្ជូននាងទៅសង្គ្រោះមន្ទីរពេទ្យមួយ ស្ថិតនៅជិតនោះ ។ ប៉ុន្តែ ដោយសារស្ថានភាពរបួសរបស់នាងធ្ងន់ធ្ងរពេក គេក៏បញ្ជូននាងទៅកាន់មន្ទីរពេទ្យ First People’s Hospital ក្នុងទីក្រុង Foshan ។
នាងត្រូវបានបំណែកកញ្ចក់ ដែលបានបាក់ចេញពីបង្កាន់ដៃជាន់ទី៣ កប់ជាប់នៅកណ្តាលក្បាល និងករបស់នាង ។
ទោះយ៉ាងណា Su Mouping ត្រូវបានប្រកាសស្លាប់នៅវេលាម៉ោង ១ និង ១៥ នាទី រសៀល ថ្ងៃទី២៥ ខែឧសភា ឆ្នាំ២០១៨ ៕ ឧត្តម