កូនភ្លោះមួយចំនួន មានចំណង់ចូលចិត្ត និងអត្ថចរឹតប្រហាក់ប្រហែលគ្នា ប៉ុន្តែកូនភ្លោះមួយគូ ដែលមានដងខ្លួនជាប់គ្នានេះ មានភាពដូចគ្នាលើសពីកូនភ្លោះផ្សេងៗទៀត។
កូនភ្លោះស្រីមួយគូឈ្មោះ Abby និង Brittany ប្រហែលជាមនុស្សដែលត្រូវបានគេស្គាល់ច្រើន និងចាប់អារម្មណ៍បំផុតក្នុងពិភពលោក ដោយសារអ្នកទាំងពីរមានដងខ្លួនជាប់គ្នាជាមនុស្សតែមួយប៉ុន្តែមានក្បាល សួត ពោះ និងឆ្អឹងខ្នងផ្សេងគ្នា។
ពួកគេជាមនុស្សពីរនាក់ ប៉ុន្តែខ្លួនតែមួយ ហើយដោយសាររាងកាយបែបនេះហើយ ទើបធ្វើឲ្យពួកគេជួបបញ្ហាប្រឈមជាច្រើនក្នុងជីវិត ប៉ុន្តែស្ត្រីពីរនាក់នេះ មានក្តីសុបិន្តដូចគ្នាសំរាប់ថ្ងៃអនាគត់ នោះគឺពួកគេទាំងពីរនាក់ ចង់ក្លាយជាគ្រូបង្រៀនដូចគ្នា។
សូមបញ្ជាក់ថា កាលពីឆ្នាំ ២០០៨ Abby និង Brittany បានសិក្សាមុខជំនាញផ្នែកអប់រំ នៅមហាវិទ្យាល័យ Bethel University ក្នុងសហរដ្ឋអាមេរិច។ ក្រោយពេលបញ្ចក់ការសិក្សាពួកគេបានធ្វើជាគ្រូបង្រៀនបឋមក្រៅម៉ោងភ្លាមៗតែម្តង៕ សុភ័ក្ត្រ